Тымныы полюһун Өймөкөөн улууһун нэһилиэктэригэр барыларыгар кэриэтэ оптоволокно ситимэ тардылынна.
edersaas.ru
Арай нэһилиэнньэлээх пууннартан Индигиир уонна Элги өрүстэр икки ардыларыгар арыыланан турар Төрүт нэһилиэгэр эрэ бу суолталаах боппуруос быһаарылла илик.
Нэһилиэк баһылыга Владимир Алексеев иһитиннэрбитинэн, бу күннэргэ кини «Импульс» НПО салайааччытын сүбэһитэ Георгий Тироны кытта төлөпүөнүнэн кэпсэтэ сырытта. Бу кэпсэтии туһунан салайааччы бу курдук билиһиннэрдэ:
— Георгий Тирон бэлиэтээбитинэн, «Халыма» федеральнай суол сирин туһаныы учаастага — «Элги» кафеттан Төрүт суолугар киирии учаастак сирин докумуона оҥоһулла илик эбит. Тустаах докумуону оҥоруу 200 тыһыынча солкуобай төлөбүрдээх. Онон сибээстээн, «Колымский экспресс» ХЭУо салайааччыта Михаил Алексеевка боппуруоһу быһаарыахпыт диэн көрдөһөн, мэктиэ сурук ыыттыбыт. Төлөпүөнүнэн кэпсэтиигэ Георгий Тирон оптоволокно ситимин Төрүккэ кэлэр сыл олунньутуттан тардан саҕалыахпыт диэн эттэ.
Онон Төрүт нэһилиэгин олохтоохторо аныгы үйэ сибээһэ киирэрин эрэнэ кэтэһэллэр.
Елена ПОТОЦКАЯ, «Саха сирэ» хаһыат, edersaas.ru