Бэҕэһээ «Ростелеком» ПАУо «Сахателеком» филиалын дириэктэрэ Константин Войтеховский Үөһээ Бүлүүгэ улуус баһылыга Владимир Поскачинныын көрсөн, оптика утаҕын тардыыны туһунан быһаарыста, туох үлэ ыыталла турарын билиһиннэрдэ. Салгыы икки салайааччылар бииргэ үлэлииргэ Сөбүлэһиигэ илии баттаатылар.
Константин Леонидовичтан аҕыйах тылы улууска сырыытын туһунан кэпсииригэр ыйыттыбыт.
— Үөһээ Бүлүүгэ бэйэм эрэ буолбакка, хамаандабын кытта кэллим. Оптика утаҕын тардыы тэрээһинин быһаарса кэлэ сылдьабын. Нэһилиэнньэ саамай долгуйар, ыйытар улахан боппуруоһунан буолар. Былаан быһыытынан атырдьах ыйын 10 күнүгэр оптика утаҕын Сунтаарга аҕалбыппыт. Салгыы балаҕан ыйын бүтүүтэ эбэтэр алтынньы саҥата Ньурбаҕа кэлиэ. Сэтинньигэ Үөһээ Бүлүүгэ аҕалыахпыт. Бу, биллэн турар, быһа барыллаан былаан буолар. Ис-иһигэр киирдэххэ, судургу буолбатах. Араас быһаарыллыахтаах боппуруостар элбэхтэр. Үөһээ Бүлүү улууһун салалтата туох кыалларынан көмөлөһүөхпүт диэн этиилэрин олус сэргии иһиттим.
— Улуус салалтата оптика утаҕын нэһилиэктэргэ тардары күүскэ туруорсар. Ити кыаллар кыахтаах дуо?
— Бу боппуруоска улуус баһылыга Владимир Семеновичтыын кэпсэттибит. Оптика утаҕын бары нэһилиэктэргэ тиэрдиэхтээхпитин туһунан Сөбүлэһиигэ баар. Биһиги билигин сметаны бэлэмнии сылдьабыт. Улуус салалтата бу бырайыакка бииргэ үлэлииргэ, көмөлөһөргө бэлэмин биллэрдэ. Бары кыттыһан үлэлээтэхпитинэ табыллыаҕа. Онон эһиил Үөһээ Бүлүү улууһун нэһилиэктэригэр оптика утаҕын тардыыны саҕалыахпыт.
Александр ТАРАСОВ.
ulus.media сайтан.