Бу күннэргэ Сунтаар улууһугар бырабыыталыстыба отчуотун үс бөлөҕүнэн хайдыһан ыыттылар.
edersaas.ru
Кириэстээххэ
Кириэстээх олохтоохторо биэнсийэ ааҕыллыытын, оҕону иитии, тендер, мусуой үлэтин, сибээс туһунан ыйытыылары биэрдилэр. Бу күннэргэ Кириэстээххэ 60 км уһуннаах оптоволоконнай утах ситимэ анал биригээдэ кэлэн үлэтин саҕалаары сылдьар. Евгений Ноговицын иһитиннэрбитинэн, «Тэлэбиидэнньэнэн уонна араадьыйанан биэрии тиэхиньиическэй киинэ» ГУТ быйыл оптиканы ситимин Сунтаар улууһугар уонна бастакынан Кириэстээх нэһилиэгэр МТС суотабай сибээс оператора 4G (LTE) сибээһи үлэҕэ киллэриэхтээх.
Атын боппуруостарга киирдэххэ, оскуола дириэктэрэ Павел Дмитриев начаалынай оскуолаҕа хапытаалынай өрөмүөнү туруорсар. Эбийиэк акылаата сытыйан, билигин сууллар туруктаах. Инньэ гынан оскуола дьиэтин биир өттүн сабан тураллар эбит. Кэпсэтиигэ «Кириэстээх» ТХПХ дириэктэрэ Владимир Егоров кыттыһан: «Эти оҥорон таһаарыыга көмө суох. Дьиҥэр, бэйэ оҥорон таһаарааччыларга, чуолаан эккэ субвенция көрүллэрэ буоллар, сыана арыы да намтыа этэ», – диэн санаатын үллэһинэ. Түмүккэ. кириэстээхтэр бырабыыталыстыбата ыытар үлэтин «биһириибит» диэн сыаналаатылар.
Куокунуга
Оробуочай бөлөх агро хайысханан үлэлээбитэ 25 сылын туолар Куокуну агрооскуолатыгар сылдьан, хортуоппуйу харайар сири, тэпилииссэни, оҕо саадын көрдүлэр.
Мунньах кэмигэр дьон учуутал хамнаһын, бэнсиин сыанатын, кырдьаҕас, кыаммат дьоҥҥо дьиэ өрөмүөнүгэр туох көмө баарын, Бүлүү өрүс уутун ыраастыырга туох үлэ барарын, химическэй собуот тутуутун туһунан токкоолостулар.
Кэлии-барыы боппуруоһа ыарахаттардааҕынан, оскуола оҕолорун сөмөлүөтүнэн араас күрэхтэһиилэргэ ыытар туһунан итиэннэ, тыа хаһаайыстыбатын граннарыгар агрооскуолалар кытталларын, МРТ аппаракка түһэргэ Мирнэйгэ направление биэрэри, банкоматы туруорустулар.
Станислав НОГОВИЦЫН, Сунтаар.