От ыйа куйаас да, ардахтаах да күннэринэн ааһан эрэр, ону кытары сайыммыт ортото тиийэн кэллэ. Сорох дьон уоппускаларыгар соҕуруу айаннаан, биитэр тыаҕа тахсан, сорохтор олох да үлэ, үөрэх үөһүгэр сылдьаллар. Эдэр ыччат сайын тугунан дьарыктаналларын, сынньаналларын туһунан кэпсээтилэр.
Мира Анастахова, Эдьигээн орто оскуолатын выпускницата:
– Быйыл оскуолабын бүтэрдим. Эксээмэҥҥэ математика уонна нуучча тылын эрэ талбытым. Күн аайы кэриэтэ бэлэмнэнэн, нуучча тылын 91 баалга туттарбытым. Онон олус үөрбүтүм. Үөрэхпин үчүгэйдик түмүктээбитим иһин, босхо билиэт бэлэхтээннэр, бу сайын Санкт-Петербург, Новосибирскай куораттарга сырыттым, күүлэйдээтим. Мантан салгыы Дьокуускайга үрдүк үөрэххэ туттарсыам этэ.
Эрхан Кривошапкин, 18 саастаах, “Бодрый день” кофейня управляющайа:
– Мин сайыным ааспыт сылга курдук үлэттэн саҕаланна. Быйыл “Бодрый день” кофейняҕа управляющай буолаары бэлэмнэммитим. Бу үлэҕэ мин биир бастыҥ доҕорум көмөтүнэн киирбитим, ол иннинэ кинини кытары иккиэн “Вафли coffee” диэн сиргэ үлэлээн кэлбиппит. Саҥа үлэҕэ кэлээт, бастаан утаа ыарырҕаппытым. Манна олох атын быраабылалардаах эбит. Ыйга 28 күн үлэлээн, икки эрэ күн сынньалаҥнаах этим. Ол гынан баран, маннык ыарахаттар «профессионал» буоларгар улахан көмө дии саныыбын. Күн ахсын саҥаттан-саҥа үөрүйэхтэри ылаҕын. Баристанан үлэлиирбэр харчы ааҕыы, клиеннары кытта кэпсэтии, утах уонна ас буһарыы барыта мин эбээһинэспэр киирэр этэ. Билигин мин баҕарбытым курдук, управляющай буоллум. Эбээһинэһим элбээтэ: барытын хонтуруоллуубун, үлэһиттэри көрөбүн, кинилэр сменаҕа тахсыбатахтарына, мин солбуйабын. Бу сотору кофейням саҥа «туочкалара» аһыллыахтаахтар. Мантан сайын үлэ өссө элбиэ дии саныыбын.
Лили Капитонова, ХИФУ естественнэй наукалар институтун үһүс кууруһун устудьуона:
– Мин санаабар, сайын саҥа саҕаланан эрэр курдук. Бэс ыйын ортотугар сиэссийэбин үчүгэйдик түмүктээн баран, практикабын дьэ саҕалаабытым. Ол курдук, икки нэдиэлэ түрэнник ааһан, сынньалаҥ бириэмэтэ дьэ саҕаланна. Мантан сайын табылыннаҕына, эдьиийбин кытта ханна эмит соҕуруу дойдуга сынньана барар былааннаахпын.
Виолетта Алексеева, 18 саастаах, абитуриент:
– Дойдубар Эдьигээҥҥэ билэр дьоммуттан ыйыталаһан, бэкээринэҕэ атыыһытынан үлэлии киирдим. Икки күн үлэлиибин, икки күн сынньанабын. Үлэбин улаханнык ыарырҕаппатым. Сотору үрдүк үөрэххэ туттарсар сыаллаахпын.
Диана Антонова