Былырыын балаҕан ыйыгар Дьокуускай куорат полициятыгар иһитиннэрии киирбит. Өрүс пордун оройуонугар ханаал кытылыгар өлүк көстүбүтүн туһунан.
Полиция холуобунай ирдэбилин оперативниктара өлүк көстүбүт сиригэр тиийэн, сирийэн үөрэтэн көрөн баран, өлүөхсүт ууга түспүт буолбакка, өлөрүү сиэртибэтэ буолбутун быһаарбыттар. Бу киһи этигэр-сиинигэр атах таҥаһын протекторын уонна кырбааһын суола-ииһэ баар эбит.
Сотору итини судебнай-медицинскай экспертиза эмиэ бигэргэппит — өлүөхсүт тылын уҥуоҕа тостубут, ол эбэтэр, муомахтаан өлөрбүттэр. Суһал-ирдиир тэрээһиннэр кэмигэр кини кимэ быһаарыллыбыт — Дьокуускай куорат 53 саастаах олохтооҕо, итинтэн чугас олорбут киһи эбит.
Бу ыар буруйу арыйыы тута кыаллыбатах төрүөтүнэн өлүөхсүт дьалхааннаах олоҕо буолбут — иһэр-аһыыр киһи буолан, дьиэтин аана сабыллыбат, киирэ-тахса, бара-кэлэ, арыгыһыттар сыбыытыыр сирдэрэ эбит.
Инньэ гынан, оперативниктар хас да биэрсийэнэн үлэлээн киирэн барбыттар. Өлүөхсүт аттынааҕы ыалларыгар сотору-сотору сылдьан туоһуласпыттар, буруй суолун-ииһин көрдөөбүттэр.
Ол түмүктээх буолбут — ити уулуссаҕа олорор биир кыыс 27 саастаах табаарыстааҕын, онто хаста да сууттана сылдьыбыт киһи буоларын, кырыктааҕын, кинини куруук кырбыырын туһунан кэпсээбит. Бүтэһик кыыһырсыыларыгар ол киһи «аттынааҕы ыалыҥ курдук дьылҕалыам» диэн сааммыта биллибит. Ити курдук, өлөрүүгэ уорбаланааччы кимин быһаарбыттар.
Бу чахчынан РФ Холуобунай кодексатын 105-с ыст. 1 чааһынан, ол эбэтэр, киһини соруйан өлөрүү бэлиэтэ баарынан, холуобунай дьыала тэриллибит.
Сабаҕалааһын быһыытынан, 2016 сыл балаҕан ыйын биир киэһэтигэр Кэбээйиттэн төрүттээх 27 саастаах киһи ити дьиэҕэ кэлбит. Онно хаһаайыны сэргэ, кини дьукаах киһитэ уонна кэргэнниилэр бааллар эбит. Бары хааһы курдук итирбит буоланнар, ким да тугу да өйдөөбөт туруктаах олорбуттар.
Бииргэ арыгылааһын кэмигэр ыалдьыт уонна хаһаайын иирсэн турбуттар. Онуоха эдэрэ саастааҕын кырбыы-кырбыы, атаҕынан моонньун үктүү-үктүү муомахтаабыт.
Киһи тыыммат буолбутун кэнниттэн өлүгү тэлиэгэҕэ тиэйэн, ханаал оройуонугар илдьэн, ууга бырахпыт. Буллахтарына даҕаны, ууга түһэн өлбүт дии саныахтара диэн эрэммит.
Хааннаах таҥастары уоттаан кэбиспит.
Билигин уорбаланааччы Силиэстийэлиир изоляторга хаайыллан олорор.
Бу туһунан СӨ ИДьМ-тын пресс-сулууспата иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.