Опера уонна балет тыйаатырыгар Жорж Бизе «Кармен» оператын премьерата буолла
Кулун тутар 27 күнүгэр Аан дойдутааҕы Тыйаатыр күнүнэн Суорун Омоллоон аатынан Опера уонна балет судаарыстыбаннай тыйаатырыгар Жорж Бизе аатырбыт операта «Кармен» премьерата буолан ааста.
edersaas.ru
Премьераны кэргэнинээн көрө кэлбит Ил Дархан Айсен Николаев опера кэнниттэн артыыстары уонна көрөөччүлэри Тыйаатыр күнүнэн эҕэрдэлээтэ.
— Бары артыыстар, үҥкүүһүттэр, хор уонна тыйаатыр симфоническай оркестра түмүллүбүт үлэлэрэ олус табыллыбыт, бу дорҕоонноох ытыс таһыныытын ылыахтааҕын ыллылар. Кэнники кэмҥэ тыйаатырдарбытыгар олус сэргэх, саҥа туруоруулар үксээн эрэллэр, биһиги артыыстарбыт талааннарын саҥа өрүттэрин арыйан, Уһук Илиҥҥэ бастыҥ тыйаатыр албан аатын тыйаатыр төннөрөн эрэр. Сүрүн ситиһиилэрбит өссө инники кэмҥэ кэлиэхтээхтэригэр саарбахтаабаппын — диэтэ Айсен Николаев.
«Кармен» опера аан дойду биэс саамай үгүстүк толоруллар опернай айымньылар ахсааннарыгар киирэр. “Кармен” Саха сиригэр аан бастаан олоччу французскай тылынан оонньонно. Көрөөччүлэр өйдүүллэригэр анаан тылбаастаах сурук тарҕатыллыбыта.
«Саха сирэ» хаһыат, edersaas.ru
Хаартыска ЯСИА