Тыва биир ааттаах-суоллаах тустууга Опан Сат аан дойду чөмпүйэнээтигэр Турция аатыттан тустуоҕа.
Европа үс төгүллээх чөмпүйүөнэ быйылгыттан Турция аатыттан тустар быраабы ылла. Гражданствотын сэргэ аатын, араспаанньатын кытта уларытта. Мантан антах күрэхтэһиилэргэ кини Ченгисхан Эрдоган аатынан кыттар буолуоҕа. Устуоруйанан уонна бэлиитикэнэн интэриэһиргиир дьон өйүгэр хатанымтыа аат дии саныыбын.
Быйыл олунньуга Керманшахеҕа (Иран) буолбут аан дойду Кубогар Ченгисхан Эрдоган иккитэ тустубута: бастакытыгар дьиэлээх уолга хотторбута, иккиһигэр монголу баһыйбыта уонна, эчэйии ылан, салгыы күрэхтэһэртэн аккаастаммыта.
Соторутааҕыта отут саастаах Ченгисхан чөлүгэр түһэн, Турция хамаанданан чөмпүйэнээтигэр ситиһиилээхтик кыттыбыт. Онон атырдьах ыйын 21 -26 күннэригэр Париж куоракка ыытыллар аан дойду чөмпүйэнээтигэр 61 киилэҕэ диэри ыйааһыҥҥа туроктарга бастакы нүөмэринэн буолар. Бу улахан түһүлгэҕэ кыттыахтаах Турция сүүмэрдэммит хамаандатын састааба бүтэһик сбор кэнниттэн биллиэҕэ.
Санатар буоллахха, Франция киин куоратыгар буолар тустууга аан дойду чөмпүйэнээтэ саҥа быраабыланан ыытыллыаҕа. Онно эр дьоҥҥо, дьахталларга көҥүл тустууга итиэннэ эр дьоҥҥо греко-римскэй (классичсекай) тустууга 24 мэтээл комплега оонньонуоҕа.
Роман ПОПОВ, “Саха сирэ” хаһыат, edersaas.ru
Хаартыска: интэриниэттэн ылылынна.