Сомоҕолуур, түмэр күн
“Оонньууларга диэри 100 күн” хаалбытын бэлиэтиир үөрүүлээх тэрээһин бүгүн, кулун тутар 26 күнүгэр, Дьокуускай куоракка ыытыллар.
Тэрээһин маҥнайгы чааһыгар улууска 1996 сыллаахха ыытыллыбыт I спортивнай Оонньуулары тэрийбит маҥнайгы хамыыһыйа итиэннэ буолаары турар VIII-с спортивнай Оонньуулары тэрийэр хамыыһыйа чилиэттэрэ, Дьокуускайга олорор, үлэлиир биир дойдулаахтарбыт, нэһилиэк түмсүүлэрэ улуус баһылыга Алексей Федотовы кытары сүбэ мунньахха көрүстэ.
Мунньахха биир дойдулаахтарбыт Уус Алдан улууһун Дьокуускайга бэрэстэбиитэлистибэтин салайааччыта Лена Заболоцкая, СӨ Ил Дарханын уонна бырабыыталыстыбатын дьаһалтатын салайааччытын көмөлөһөөччүтэ Гаврил Васильев, министиэристибэлэр, биэдэмистибэлэр, тэрилтэлэр салайааччылара, исписэлиистэрэ, 1996 сыллааҕы оонньууларга улуус баһылыгынан үлэлээбит Афанасий Васильевич Мигалкин, тэрийэр хамыыһыйа чилиэттэрэ, нэһилиэк баһылыктара, о.д.а. кыттыыны ыллылар.
Сүбэ мунньах саҕаланыытыгар «Ахтан-санаан ааһыаҕыҥ» диэн түһүмэҕинэн 1996 сыллаахха буолан ааспыт Оонньуулар видеороликтарын көрүү буолла. Бу ролигы толору улуустааҕы киин бибилэтиэкэ ютуб ханаалыгар көрүөххүтүн сөп.
Буолаары турар VIII-с спортивнай Оонньуулар дирекцияларын салайааччыта Петр Сивцев бэлэмнэнии үлэтин хаамыытын билиһиннэрдэ.
— 2020 сылтан от ыйын 4- 9 күннэригэр ыытыллар Оонньуулары тэрийэргэ 13 хамыыһыйа үлэлиир. Ааспыт сылга дириэксийэ тэриллэн, бу хамыыһыйалары сүрүннүүр. Спортсменнар барыта 19 араас спорт көрүҥэр күрэхтэһиэхтэрэ, барыллааһын киирсиилэргэ улуус хамаандата путевкалары ылан иһэр. Күрэхтэһиилэр Чараҥ, Майаҕас, Тулуна спорт саалаларыгар, Сыырдаахха ытыы полигонугар буолуохтара, барыта 30 бэлэмнэммит эбийиэккэ ыалдьыттар, кыттааччылар, спортсменнар түһүөхтэрэ. Спартакиада көрөөччүлээх ыытылларын ситиһэ сылдьабыт, маны тэҥэ Саха НКИХ ханаалынан, бэчээтинэй таһаарыыларга, интэриниэт ситиминэн сырдатыы үлэтэ тэриллиэ. Барыта 250 волонтер үлэлиэҕэ. Оонньуулар үөрүүлээх аһыллыыларыгар, сабыллыыларыгар 2000 кэриҥэ киһи кыттыаҕа. Сүүһүнэн култуурунай тэрээһиннэр ыытыллыахтара. Билигин ырааһырдыы үлэтэ улуус үрдүнэн бара турар.
— Маны тэҥэ Дьоруой Егоров аатынан бульвар оҥоһуллуо, Геройдал аллеялара саҥардыллыа, Майаҕатта пааматынньыга туруо, суоллар өрөмүөннэниэхтэрэ.
— Саҥа хамыыһыйа бастакылар үлэлэригэр тирэҕирэн, эһиги сүбэҕитин истэн, ылынан Оонньууларбытын тэрээһиннээхтик ыытар туһугар сомоҕолоһуохпут.
Маны сэргэ саха сирин норуоттарын I-гы спортивнай оонньууларын сырдатар быыстапка турда итиэннэ улуус устуоруйатын, олоҕун-дьаһаҕын сырдатар ролигы презентациялааһын үөрүүлээх быһыыга-майгыга буолла.
Маҥнайгы спортивнай оонньуулар тэрийэр хамыыһыйаларын солбуйар бэрэссэдээтэлигэр, оччолорго улуус баһылыгынан үлэлээбит Афанасий Васильевич Мигалкиҥҥа тыл бэрилиннэ:
«Оччолорго харчы-үп олус ыарахан этэ, биир дойдулаахтарбыт уонна оччотооҕу өрөспүүбүлүкэ салалтата өйөөн Оонньууларбытын тэрийэн ыыппыппыт. Стадион тутуутугар, суол оҥоһуутугар, оонньуулар тэрээһиннэригэр улуус актыыба, тэрилтэ салайааччылара, түөлбэлэр, ыччаттар бары биир киһи курдук түмсэн, бу үлэлэр сиппиттэрэ. Онон билигин эмиэ бука бары түмсэн үлэ барыах тустаах, сүүс хонук диэн олус кылгас, онон түмсүүлээх үлэҕэ турунуоҕуҥ», — диэн ыҥырда.
Салгыы «Оонньууларга диэри 100 күн» тэрээһининэн Оонньулар салайар кэмитиэттэрин, улуус актыыбын төгүрүк остуола, эҕэрдэ кэнсиэр тэриллиэҕэ.
Екатерина Захарова