Оо.Саҥа дьыл,
Саҥа Дьыл барахсан
Сүүрүүтэ-көтүүтэ
Түбүгэ-садьыга,
Тиэтэлэ-таатала
Төтөлө суох сүүрүү
Тигинээн кэлбитэ
Тэтимэ түргэнэ
Туох да тохтоппот!!!
Этимэ даҕаны-ы!
Эргинэр дьиэлэргэ
Элэстэнэн тиийиэххэ,
Кэрийэн көрүөххэ!
Уу,дьэ сэгээр!
Киэргэлэ-симэҕэ
Киһини сөхтөрөр
Килэйии-халайыы
Тоһуйа тэлгэммит!
Кэбис доҕор, бастаан
Таһырдьа ойуохха
Харыйа мас ханнатын
Хайдаран булуохха!
Хайыы,хотуой!
Хаһыытыыр харчы-ы!
Халлаан сыаната,
Хармаан хапсыгыр…
Хайыах баҕайыныый?!
Бэс маһы бэрийиэх,
Бэһи да туруорар
Бэртээхэй буолааччы!
Барахсаан! Көрөн үөр
Бас барар сыаната!
Буоллуун-буоллун!
Быһаарына оҕус,
Билигин бүтүөҕэ
Биэтэҥнии сылдьыма!
Оо. Аҕыйах күҥҥэ
Олох ороскуот
Отой ылбаппын!
Оҥоруу харыйа
Оһуобай буолуоҕа…
Сыл аайы туруоран
Сыанатын толуйуо
Саарыы барбакка,
Сибилигин талыам!
Дьэ, аны симэҕи
Сыымайдыы түһүөххэ!
Уу,кырдьык
Умна сыстым
Улдьааран хааллым!
Гирлянда кэрэтэ
Көрүҥэ элбэҕэ
Күлүм-чаҕыл чипчиҥнээн
Эчи үчүгэйэ…
Оонньуур арааһа
Остуоруйа олоҕо
Отон курдук хойуу
Олох көрөр харах арахпат!
Бииртэн биирэ баһыйар
Бэртээхэй оонньуурдар
“Миигин ыл!”- диэбиттии
Мичиҥнии сыталлар,
Имнэнэн ылаллар.
Бэрт өр сыныйан
Бутуллан-буккуллан
Уура-уура көрөн,
Ыла-ыла ууран
Төттөрү- таары тиэстэн,
Тээтэҥнээн-тэпсэҥнээн
Сылайыар диэри сыымайдаан
Син ону-маны
Сыыр-мыыр атыыласта.
Сынньана түһээри
Олорор сир көрдөннө,
Ол-бу диэки
Олоотоон көрдө.
Туох да суох,
Мээс-мэлигир,
Ып-ыраас
Тугу да булбакка
Таһырдьа таҕыста.
Аан туман аргыара
Аҥкылыс гынна
Тоһуттар тымныы
Чачата сыста.
Тойота арааһа
Тоһуйан тураллар.
Тиэтэл соҕустук
Массыына көрдөнөн
Дьиэтигэр тэптэрдэ.
Күнүскү чэй күүппүт,
Күнүн аҥара көппүт
Күүс-күдэх бүппүт.
Аҕалбыт атыытын
Дьиэ дьоно көрдүлэр.
Астыныы-уоскуйуу.
Хайҕааһын,махтаныы!
“Хайыы, оттон аны
Бэлэхпит-туһахпыт?!”
Дьэ доҕоор эмискэ
Атын араллаан
Аана аһылынна!
Оҥой-соҥой көрбүт
Оҕолоро-оокколоро
Тымныы оҕонньор
Кэһиитин күүтэллэр,
Күннэтэ кэтииллэр —
Сакаас бөҕө биэрбиттэр!
Ыаллара-дьонноро
Ыҥырыы ыыппыттар,
Ыалдьыттааҥ! — диэбиттэр.
Атастара-доҕотторо,
Аймахтара-хааннара,
Бэртээхэй түгэҥҥэ
Түмсуөҕүҥ диэннэр
Төлөпүөн-түрүлүөн
Тирилээн олордо!
Туллар тутаах тэрилтэ
Түбүктээх үлэтин
Түмүгэ тахсар
Тэрээһинэ буолар,
Биир дьоһун сорук
Корпоратив күүтэр.
Оо! Уҥа-хаҥас көрдө
Уһуутаан ылла
Оронун булла!
Оо,Саҥа Дьыл!
Саамай суолтата
Оҕо өйүгэр хатанар түгэнэ
Оонньотор -сааратар
Маскараат баала
Биир баһаам түбүк
Тоһуйан бу кэлбит.
Туймааран ылла,
Мэйиитэ эргийдэ!
Хайыы,хайдах дьиэҕэ
Хаайтаран олоруой?!
Саҥа сылы көрсөр
Үөрүүттэн-көтүүттэн
Тоҕо туора туруой?!
Дьоҥҥо тиксэр
Дьолтон матыай?!
Саҥа сылы көрсөр
Үтүө үгэс умнуллуой?!
Бар дьон сиэринэн
Барсан иһэр баҕа
Баһыйан барда.
Бырааһынньык бэлэмэ
Баллайар баһаам!
Таалалаан сыппакка
Тиэтэллик тэринэн
Эргинэр дьиэҕэ
Элэстэнэ турда!
Саҥа сылы көрсөргө
Барыта саҥа буолуохтаах.
Дьиэ дьоно бүтүннүү
Саҥа таҥас кэтиэхтээх.
Дьиэни өрө тардыы,
Суунуу-тарааныы,
Бөҕү-саҕы хомунуу,
Эргэни-урбаны быраҕыы.
Дьуолканы туруоруу!.
Саҥа сыл сандалыта
Аһы-үөлү булунуу
Ырыынак дьиэҕэ
Оргуйан олордо.
Уус Дьааҥы чыыра,
Уорҕа сирин убаһата,
Хоту дойду тоҥ аһа,
Балык ас туустааҕа,
Барыта атыыланна.
Омук сирин
Сонун астара
Пицца,хотдог,
Чизбургер,шаурма
Медовай,шоколаднай
Тортар араастара
Эт ас эгэлгэтэ,
Кэтилиэт,тефтель,
Хара баһаам буолла.
Оттон бэйэбит
Төрөөбүт астарбы-ыт!
Баахыла,лэппиэскэ
Алаадьы,саламаат
Бурдук ас талыыта
Эттээх бэрэски,
Хворост, пельмен
Бэчиэнньэ көрүҥүттэн
Бүтүннүү астанна!
Оҕо-аймахха соктар,
Бэһиэлэй буоларга,
Үөрэргэ-көтөргө
Кыынньар,көөнньөр
Уохтаах утахтар,
Фрукта ас үтүмэнэ,
Мандарин,бинэгэрээт,
Банан,дьаабылака
Этэ да барыллыбат!
Ити курдук тэринэн
Түбүктээх Саҥа Дьыл
Күүтүүлээх түгэнэ
Дьэ кэллэ доҕоттоор!
Оҕо-аймах үөрүүтэ
Уһун каникул саҕаланна.
Тос-тос тайахтаах
Тымныы оҕонньор
Дьуолката саҕаланна!
Оҕонньор кэһиитин
Оҕо ахсын түҥэттэ.
Бастыҥ үөрэнээччи
Бэлэх-туһах тутта.
Сиэнэ кыыс Хаарчаана
Саҥа Сылы аҕалла.
Оҕо-аймах үөрүүтэ
Ырыа,дьуохар дьиэрэйдэ,
Үҥкүү-битии саҕаланна!
Омуннаах оонньуу олохтонно!
Сир-сир аайы
Саҥа Дьыл үөрүүтэ
Сириэдийэн олордо!
Саҥа сыл барахсан
Сынньатара элбэҕэ
Сааратара үгүһэ
Сүрэхтээҕи сүүйдэ!
Сыа киһи сылайда,
Эт киһи элэйдэ.
Хармаан хапсыйда,
Хамнас хаалбата,
Биэнсийэ баранна.
Хаарга хаамар
Сииккэ сиэлэр
Кырыымчык күннэр
Күөрэс гына түстүлэр!
Дьэ эбэтээ!
Кыһалҕа да эбит…
Кыһыыта-абата
Көртөн-нартан
Кэһэйбэт эбиппит.
Саҥа сыл умсулҕана
Уостубат таптала
Көр оннук күүстээх
Буолар эбит доҕоттоор!
Сэҥээрэ.
2025 с.