Эдэр, кыанар эрдэххэ, күһүн-саас хааман хантаарыҥнаан иһэн, суолга килэккий мууһу көрдөххө, күлэ-күлэ хатыыскалаан сырылатан ааһар буолуллара. Сэниэ, сүһүөх мааны да буоллаҕа. Оччолорго билиҥҥи курдук килэриччи тоҥмут мууска-хаарга үктэннэхпинэ, сүһүөхтэрим хамсыахтара, тобуктарым бакыһыахтара диэн толкуй суох буоллаҕа. Мэлдьи эдэр сылдьыах курдук…
Дьэ, билигин кэлэн, сэниэ эстэн, сүһүөх мөлтөөн бокооруйбут, эмэнсийбит оҕонньор, күһүҥҥү-сааскы халтараантан өлөрдүү куттанар, таһырдьа тахсан хаамарбын абааһы көрөр буолан иһэбин. Кэһэй буолбутум бэрт. Хас да сыллааҕыта Чирээйэп уулуссатынан “Люкус” атылыйыа аттынан саллырхайдаан иһэн, чоху көхсүн курдук муустан халты тэбинэн, биирдэ атахтарым үөһээ адаарыһан эрэллэрэ баара. Тайана түһэн, уҥа илиибин бэгэччэкпинэн тосту түһэн кэбиспитим. Көрөн турдахпына сөллөччү иһэн тахсыбыта.
Былырыын баччаларга тэлгэһэбитигэр анал сиргэ бөхтөөх мөһөөччүгү быраҕа тахсан баран, хаҥкылыыр сир курдук килэриччи тоҥмут аспаалга тиэрэ таһыллан, кэтэхпинэн сааллан мэйиибин добуоччу доргутан турабын. Биирдэ өйдөнөн кэлбитим, ааһан иһэр нуучча дьахтара тугу эрэ аймана-аймана санныбыттан тардан олордо сатаан булумахтана сылдьар эбит. Мин сүрэҕим өлөхсүйэн, барахсаны сиирэ-халты хотуолаан ыһылыннардаҕым үһү. Дьахтарым кыбартыырам, төлөпүөнүм нүөмэрин ыйытарын дьэ өйдөөн, кэргэним төлөпүөнүн нүөмэрин нэһиилэ этэн биэрбиппэр эрийэн тыллаабытыгар, эрэйдээҕим кыыспытынаан сүүрэн тахсаннар, дабыдалларбыттан ылан өйүүр-соһор былаастаан дьиэбитигэр киллэрэн ороммун булларбыттара.
Инньэ гынан, күһүн-саас сир тоҥорун-ирэрин абааһы көрөр, хаһан кыстык хаар чигдийэрин, саас сир куурарын кэтэһэр буолан хааллым. Мин эрэ буолуо дуо, сааһырбыттар, кырдьыбыттар барыбыт кыһалҕабыт буоллаҕа. Билигин атын кэм, ирдэбил. Дьоллоох Дьокуускай куораппытыгар суолу-ииһи, уулуссалары, тротуардары, болуоссаттары-сквердэри мэлдьи ыраастыыр, көрөр-истэр буоллулар. Үөлээннээхпин, “Якутдорстрой” тэрилтэ бэтэрээн оробуочайа, үйэ аҥаарыттан ордук кэм устата күрдьэҕин, сиппиирин угун ыһыктыбакка тапталлаах куоратын уулуссаларын кыһыннары-сайыннары харбыы, сиппийэ сылдьар 80-нун ааспыт Хабырыыл Үстүүнэби мэлдьи үөрэ, махтана көрөбүн. Таарыччы эттэхпинэ, куораппыт Ийэ хотуна Сардаана Быладьыымырабына, дьокутааттарбыт бу Ытык кырдьаҕаска болҕомтолорун туһаайан, сыаналаан Бочуоттаах олохтоох аатын иҥэрдэллэр, куорат олохтоохторо бары да астыныа, үөрүө этибит.
Кини курдук бэриниилээх, кини туйаҕын хатарар эдэр-эмэн “суол сиппийээччилэр”, ыраастааччылар баар буолан, куораппыт ыраас, чэбдик, кэрэ. Ол да буоллар, кыһыҥҥы добдурҕа, сааскы ириэрии-тоҥоруу халтараан кэмигэр, кырдьаҕастар барахсаттар, сэрэнэн-сэппэнэн сылдьыа этигит.
Биэстэс БИЛЭЭХЭП
Хаартыскалар: интэриниэттэн