Эдэр олоҥхоһут Юрий Борисов “Ааттаах олоҥхоһуттар аартыктарынан, ытык кырдьаҕастар ыллыктарынан” ааптарыскай бырайыагынан кулун тутар 3 күнүгэр Нам улууһун Хатырык нэһилиэгэр Максим Аммосов аатынан Судаарыстыбаннас түмэлигэр мустубут дьоҥҥо «Баһырҕастаах аттаах Баабый Боотур» олоҥхотун саҥа, ситэриллибит барыйаанын 2 чаас 14 мүнүүтэ устата олоҥхолоон иһитиннэрдэ.
—Хатырык нэһилиэгин дьоно-сэргэтэ олус диэн аламаҕай эбит. Ытыс үрдүгэр түһэрэн илдьэ сырыттылар. Биллэриитэ эрдэ барбыт буолан, 30-тан тахса истээччи кэлэн олоҥхону толору иһиттилэр. Итини тэҥэ Францияттан кэлэ сылдьар биир француз омук киһитэ кытта иһийэн олорон иһиттэ. Бүгүҥҥү сырыыбын үөлээннээҕим Вера Цыпандина арыаллаата. Кини миигин истиэм этэ диэн Нам сэлиэнньэтиттэн анаан-минээн кэлбит эбит. Итини тэҥэ бэйэтин үөрэнээччитин, Маймаҕа нэһилиэгин саҥа саҕалаан эрэр, олоҥхо толорорго холонор баҕалаах иитиллээччитин илдьэ кэлбит. Онон, түгэнинэн туһанан, Хатырык нэһилиэгин кулуубун үлэһиттэригэр бука барыларыгар, кэллиэгэбэр Вера Цыпандинаҕа, былаан бөҕөтүн былааннаабыт Елена Владимировнаҕа, тэрээһиммит чахчы көхтөөхтүк, үрдүк таһымнаахтык ааспытынан барҕа МАХТАЛБЫН тиэрдэбин , — диир Юрий Петрович.
“Ыччат олоҥхоһут” ассоциация салайааччыта Юрий Борисов кулун тутар 22-23 күннэригэр Хатырыкка ыытыллар аатырбыт олоҥхоһут Василий Николаевич Попов-Бочоох төрөөбүтэ 110-сылыгар аналлаах «Куйуур Олоҥхото — 2019» өрөспүүбүлүкэтээҕи күөн-күрэскэ эдэр олоҥхоһуттары көхтөөхтүк кытталларыгар ыҥырда.
«ААТТААХ ОЛОҤХОҺУТТАР ААРТЫКТАРЫНАН, ЫТЫК КЫРДЬАҔАСТАР ЫЛЛЫКТАРЫНАН» экспериментальнай бырайыак билиҥҥи туругунан Нам улууһун 10 нэһилиэгин хапта. Бырайыак салҕанар.
Татьяна МАРКОВА, «Саха сирэ» хаһыат, edersaas.ru