“Дьулуур кыһата” ааптарскай онлайн-оскуола муус устар 10 күнүттэн интэриниэт ситимин нөҥүө үлэтин саҕалаата. Баҕалаах оҕо, төрөппүт, учуутал сахалыы саҥара, ааҕа үөрэниэн сөп.
Оскуола сыалын, үлэтин туһунан куурус ааптара, РФ үөрэҕириитин бочуоттаах үлэһитэ, СӨ үөрэҕириитин туйгуна, “Методист Якутии” бэлиэ хаһаайына, 45-с сылын учууталынан бэриниилээхтик үлэлиир Татьяна Артамоновна Скрябина маннык кэпсиир:
— Онлайн-оскуола сыалынан нууччалыы тыллаах саха оҕотун төрөөбүт тылынан саҥара, ааҕа үөрэтии буолар. Билигин сахалыы саҥарар үөрүйэх сүттэ. Онон олох кыһалҕата кыһарыйан, үөрэтии ньыматын толкуйдаан, бу үлэнэн дьарыктанар буолбутум диэххэ сөп.
Төрөөбүт тылынан саҥарбат оҕо олус элбээтэ. Сахалыы оскуолаҕа киирэр эбэтэр үөрэнэр оҕолоох төрөппүт бу онлайн-оскуолаҕа оҕотун кытта тэҥҥэ дьарыктаныан сөп. Онлайн- оскуолабытыгар икки кууруһу ыытабыт. Бастакы куурус — төрөппүт уонна оҕо дьарыктара. Манна барыта быһаарыылаах 22 видео-уруок киирэр. Дьиэҕэ үлэни биэрэбин, бэрэбиэркэлиибин уонна ыйытыыларга тутатына эппиэттиибин. Дьарык түмүгэр оҕо сахалыы саҥара, ааҕа үөрэнэр. Иккис — учуутал үөрэтэр оҕотун кытта уруоктара.
“Дьулуур кыһата” sakhaschool.online/juluur саайтыгар киирэн, дьарыкка суруйтарыахха сөп. Бастакы дьарык босхо, салгыы үөрэнэр төлөбүрдээх. Ону таһынан, @juluur_kyhata «Инстаграм» сирэйгэ куурус ис хоһоонун, сыалын-соругун, үөрэтэр ньыматын кытта билсиэххэ сөп.
Ньургуйаана Иванова, “Саха сирэ” хаһыат, edersaas.ru
Хаартыска — «Дьулуур кыһата» онлайн-оскуолаттан.