Сергей Зверев-Кыыл Уола аатынан Национальнай үҥкүү тыйаатыра бэйэтин YouTube ханаалыгар көрдөрөр испэктээктэриттэн бүгүн «Бохсуруйуу» этнобалеты уонна «Куллустай Бэргэн» диэн Сергей Зверев-Кыыл Уола олоҥхотун матыыптарынан мусукаалынай-үҥкүү испэктээги көрөргүтүгэр ыҥырабыт.
«Бохсуруйуу» (Этнобалет )
Премьера 1997 сыл кулун тутар 15 күнүгэр буолбута.
Композитор – Владимир Ксенофонтов
Либретто ааптара, туруорааччы- режиссер — Афанасий Федоров
Туруорааччы-хореограф – Геннадий Баишев
Туруорааччы-худуоһунньук — Мария Ядрихинская
Туруорааччы-дирижер – Николай Петров
«Бохсуруйуу» — саха ойууна хараҥа күүстэри, куһаҕан тыыны үүрүүтэ. Испэктээккэ, ойуун буоларга сэрэбиэй түспүт эдэр уол устуоруйата кэпсэнэр. Улуу Ойуун букатыннаахтык барарыгар солбугунан кинини көрбүт эбит.
«Бохсуруйуу» этнобалет – саамай элбэх титуллаах, үгүс наҕараадалаах испэктээк буолар. Москва, Санкт-Петербург, Сургут, Хабаровскай, Нерюнгри куораттар сценаларыгар ситиһиилээхтик турбута, Уус-Алдаҥҥа, Чурапчыга, Тааттаҕа гостуруоллаабыта. Марий-Эл Өрөспүүбүлүкэ тэрийэр электроннай театральнай бэстибээлин кыайыылааҕа – I истиэпэннээх диплом. Өрүүскэ оруолун уһуннук Ирина Петухова (Дмитриева), Паша Сидорова ситиһиилээхтик толорон кэлбиттэрэ. Кыр Кыыс уустук уобараһын Долаана Федотова итэҕэтиилээхтик арыйар. 1998 сыллаахха Москва сценатыгар Кыр Кыыһы Зоя Соловьева үҥкүүлээбитэ. Билигин бу оруолу Изабелла Егорова толорор.
Сүрүн оруолу Сээнэгэйи хайыы-үйэҕэ 20-тэн тахса сыл устата артыыс Дмитрий Артемьев чаҕылхайдык толорор. Бу оруолунан Дмитрийи көрөөччү таптаата. Сэмэнчик оруолугар — артыыстар Филипп Фомин, Семен Иванов уо.д.а. Ийэ Кыыл оруолугар Афанасий Афанасьев итиэннэ Юрию Зубков үҥкүүлүүллэр. Титулованнай артыыстар Дмитрий Попов-Хобочоон, Петр Колесов, Геннадий Баишев муударай, мындыр Кырдьаҕас Ойуун уобараһын арыйаллар. «Бохсуруйуу» этнобалет үчүгэй, дьоллоох дьылҕалаах. Элбэх көрөөччүлээх. «Бохсуруйуу» туһунан киин уонна өрөспүүбүлүкэ СМИ-лэрэ үгүстүк суруйдулар, “Саха” НКИХ киинэ уһулла.
«Куллустай Бэргэн»
С.А.Зверев-Кыыл Уола
«Кулун кугас аттаах Куллустай Бэргэн»
олоҥхотун матыыптарынан мусукаалынай-үҥкүү испэктээк
Премьера 2015 сыл бэс ыйын 16 күнүгэр буолбута. Испэктээк С.А.Зверев-Кыыл Уола төрөөбүтэ 115 сылыгар ананар.
Композитор – Игорь Воробьев
Либретто, туруорааччы-хореограф – Юрий Федоров
Туруорааччы-режиссер – Александр Титигиров
Туруорааччы-худуоһунньук — Олег Молчанов
Туруорааччы-дирижер – Николай Петров
Научнай консультаннар – филос. н.д. Ксенофонт Уткин,
ХИФУ научнай үлэһитэ, СӨ култууратын туйгуна Варвара Обоюкова.
Сүрүн хаартыскаҕа: «Куллустай Бэргэн» испэктээктэн сцена.
edersaas.ru