Муус устар ыйга ким баҕалаах онкомаркерга хаанын босхо туттарар кыахтанна. Ол курдук, искэни эмтиир өрөспүүбүлүкэтээҕи диспансер “Онкопоиск” өрөспүүбүлүкэтээҕи ааксыйаны ыытар.
edersaas.ru
Аахсыйаҕа бастакынан СӨ Ил Дархана Айсен Николаев кэргэниниин кытыннылар. Айсен Сергеевич: “Хас биирдиибит доруобуйатыгар бэйэтэ эппиэттиир”, — диэн Саха сирин олохтоохторун аахсыйаҕа көхтөөхтүк кыттарга ыҥырда. Ыам ыйын 13 күнүгэр диэри ыытыллар дьаһал “Доруобуйа харыстабыла” национальнай бырайыак “Искэн ыарыыларын утары охсуһуу” диэн биир сүрүн хайысхатын чэрчитинэн ыытыллар.
Манна даҕатан эттэххэ, кэнники үс сылга искэн ыарыытын эрдэ быһаарыы көрдөрүүтэ биллэ тубуста. Өскөтүн 2016 сыллаахха ыарыһахтар 18 эрэ бырыһыаннарын искэн бастакы түһүмэҕэр булар буоллахтарына, бу сыыппара билигин 46% тиийдэ.
Аахсыйа кэмигэр куорат олохтоохторо Стадухин уул. 81 нүөмэригэр, 1 куорпуска баар өрөспүүбүлүкэтээҕи диспансерга, оттон улуус олохтоохторо оройуоннааҕы балыыһаларга туттараллар.
Анаалыс туттарарга пааспары, медицинскэй полиһы, СНИЛС илдьэ, аһаабакка эрэ кэлиллэр. Анаалыстары үлэ күннэригэр сарсыарда 9.00-11.00 диэри туталлар.
Онкомаркер организмҥа искэн үөскүүр кутталын эрдэ быһаарарга, наада буоллаҕына, салгыы скрининг чинчийиилэри ыытарга уонна ыарыы хаамыытын кэтээн көрөргө наадалаах.
Надежда ЕГОРОВА, “Саха сирэ”, edersaas.ru