Доруобуйа

Онкологтар биригээдэлэрэ Өлүөхүмэ улууһугар үлэлиир

«Өрөспүүбүлүкэ сүрүннүүр мэдиссиинискэй тэрилтэлэрин мобильнай биригээдэлэрэ улуустарга тиийиилэрэ -– улуустар олохтоохторо Дьокуускайга эбэтэр улуус кииннэригэр кэлэ сатаабакка, олорор сирдэригэр үрдүк технологиялаах көмөнү ылар табыгастаах ньымалара. Быраастар ыраах сытар уонна суола-ииһэ мөлтөх сирдэри хабан туран, үлэлэрин географиятын кэҥэтэллэрэ олус суолталаах», -– диэн СӨ Ил Дархана Айсен Николаев  бэлиэтээбитэ.

edersaas.ru

Ол курдук, онкология өрөспүүбүлүкэтээҕи диспансерын «Онкодесана» быйыл Аллайыаха, Анаабыр, Үөһээ Халыма уонна Горнай улуустарыгар үлэлээбитэ.
Онтон  бэс ыйын 7 күнүттэн Өлүөхүмэ улууһугар үлэтин саҕалаата. Диспансер исписэлиистэрэ нэһилиэнньэ доруобуйатын көрүөхтэрэ уонна араагы эрдэттэн сэрэтиигэ сүбэ-ама биэриэхтэрэ.
Биригээдэ Өлүөхүмэ куоракка эрэ буолбакка, 1 уонна 2 Нөөрүктээйи, Абаҕа, Кээччи, Өлүөхүмэ, Улахан Муҥку уонна Үҥкүр сэлиэнньэлэригэр тиийиэҕэ.
Артур Протодьяконов салайааччылаах биригээдэҕэ онкогинекология отделениетын сэбиэдиссэйэ Светлана Мыреева, ультразвуковой диагностика бырааһа Мария Гурьева, хирург-онколог Анастасия Парфёнова уонна анестезист-мэдиссиинискэй сиэстэрэ Александра Корнилова бааллар.
«Ыарыыны эрдэ быһаарыы уонна нэһилиэнньэни ыарыыны сэрэтэр мэдиссиинискэй дьаһалларга кытыннарыы биһиги үлэбит сүрүн хайысхатынан буолар. Мэдиссиинискэй чинчийии кэнниттэн онкология ыарыыта сибикилээх дьон Дьокуускайга кэлэн салгыы эмтэниэхтээхтэр, -– диэн онкология диспансерын кылаабынай бырааһа Татьяна Николаева иһитиннэрдэ.

Надежда ЕГОРОВА, «Саха сирэ» хаһыат, edersaas.ru

0
0
Telegram @edersaas20