Онкология кафедрата баар буолла

Бөлөххө киир:

Дьокуускай куоракка Медицина институтугар онкология кафедрата баар буолла. Бу – Саха сирин доруобуйатын харыстабылын уонна онкология сулууспатын устуоруйатыгар киллэриллэр бэлиэ түгэн.


Онкология өрөспүүбүлүкэтээҕи диспансерын уонна М.К.Аммосов аатынан ХИФУ икки ардыларыгар түһэрсиллибит дуогабар быһыытынан, кафедраҕа устудьуоннары онкология хайысхатыгар дириҥник үөрэтиэхтэрэ. Ону сэргэ, былаан быһыытынан ыытыллыахтаах холбоһуктаах научнай чинчийиилэр түмүктэрэ клиническэй онкологияҕа туһаныллыахтара.
Кафедра преподавателларын састаабыгар диспансер үгүс үөрүйэхтээх онкологтара уонна Арассыыйа онкологияҕа сүрүннүүр институтун профессора, медицинскэй наука доктора бааллар. Базовай кафедра сэбиэдиссэйинэн медицинскэй наука доктора, профессор, СӨ үтүөлээх бырааһа, үрдүкү оскуола бочуоттаах үлэһитэ, СӨ Судаарыстыбаннай бириэмийэтин лауреата, онкология сулууспатын бэтэрээнэ Петр Иванов ананна.
Биллэрин курдук, былырыын Дьокуускайга радиология отделениета өрөмүөн кэнниттэн, оттон быйыл ыам ыйыгар куорат 3 №-дээх базатыгар онкологияҕа бастакы көмө киинэ өрөспүүбүлүкэҕэ бастакынан аһыллыбыта. Сотору кэминэн Онкология киинин күүтүүлээх дьиэтин тутуу саҕаланыаҕа. Онон, бэйэбит институппутугар үөрэммит уонна идэлэрин дириҥэппит исписэлиистэр искэни эмтииргэ уонна олох хаачыстыбатын тупсарарга туһалаах буолаллара саарбаҕа суох.

Надежда ЕГОРОВА, “Саха сирэ” хаһыат, edersaas.ru

Хаартыска министиэристибэ сайтыттан ылылынна

+1
0
+1
0
+1
0
+1
0
+1
0
+1
0
+1
0