Онкология диспансера араас искэни эрдэ буларга көдьүүстээх үлэтэ салҕанар.
Диспансер мультидиссиплинарнай онко-биригээдэтэ сэтинньи 30 күнүттэн ахсынньы 7 күнүгэр диэри ыраах Булуҥ улууһугар үлэлээтэ. Диспансер быйыл өрөспүүбүлүкэ 10 улууһугар сылдьан, олохтоохтор махталларын ылыан ылла.
Биригээдэ Тиксии бөһүөлэгэр уонна Быковскай сэлиэнньэҕэ тиийэн, нэһилиэнньэҕэ тустаах мэдиссиинэскэй көмөнү оҥордо. Биригээдэ састаабыгар гинеколог, онколог-быраас Наумова Анжелика Ларионовна, онколог-хирург Кюндяйцева Ольга Васильевна, УЗД бырааһа Гурьева Мария Николаевна, мэдиссиинискэй сиэстэрэ Харлампьева Иванна Алексеевна,бөлөх салайааччыта Протодьяконов Артур Павлович бааллар.
Булуҥ улууһугар барыта 208 киһи доруобуйатын көрдүлэр. УЗД бырааһа 199, онко-гинеколог 124 чинчийиини ыытта.
Ону сэргэ, биригээдэ нэһилиэнньэҕэ ыарыыттан харыстанарга, доруобуйаны кэмигэр көрдөрүнэ сылдьарга бэсиэдэни ыытта. «Эмчиккэ кэмигэр көрдөрүннэххэ, искэн ыарыытын кыайыахха сөп. Ыарыыны эрдэттэн, өссө ыарыы сибикитэ биллэ илик кэмигэр булуу уонна уталыппакка эмтэнии ыарыы содулларын суох оҥорорго көмөлөһөр», -– диэн быраастар сүбэ-ама биэрдилэр.
Надежда ЕГОРОВА, «Саха сирэ», edersaas.ru