Онкодиспансерга саҥа аппарааттар кэллилэр

Бөлөххө киир:

“Искэн ыарыыларын утары охсуһуу” эрэгийиэннээҕи бырагыраама чэрчитинэн, Өрөспүүбүлүкэтээҕи онкологическай диспансер тохсунньуттан балаҕан ыйыгар диэри мэдиссиинэ аныгы 8 анал тэрилин ылбыта.

Эндоскопическай отделениеҕа видеогастроскоп, видеоколоноскоп уонна видеобронхоскоп диэн тэриллэр кэллилэр. Бу балар куртахха-оһоҕоско, ас буһарар уорганнарга искэн тахсыбытын чинчийэргэ туһаныллаллар. Анал тэриллэр туруоруллуохтарыттан 500-тэн тахса чинчийиини ыыттылар.

Анестезия, реанимация уонна интенсивнэй терапия отделениетыгар тыҥаны салгынынан хачайдыыр эрэсиимнээх икки наркознай-тыынар аппарааттар кэлбиттэрэ. Маннык аппарааттар эпэрээссийэ кэмигэр хайаан да наада буолаллар.

Бэс ыйыгар кэлбит эпэрээссийэҕэ туттуллар микроскоп хирурдар харахтарын сылаппакка көрөллөрүгэр, хаачыстыбалаахтык үлэлииллэригэр аналлаах. Бу микроскобу туһанан, 11 эпэрээссийэ оҥоһуллубут.

Атырдьах ыйыгар сардаҥанан чинчийии киинигэр маммографическай комплекс кэлбитэ. Бу комплекс бэйэтэ биопсияны ылар уонна томосинтеһы оҥорор кыахтаах. 19 дьахтарга маммография оҥоһуллубут.

Национальнай бырайыак көмөтүнэн онкодиспансеры техническэй хааччыйыы 2019 сылтан саҕаламмыта. Бу кэмтэн ыла биһиги үрдүк технологиялаах мэдиссиинэ көмөтүн оҥорорбут элбээтэ, хаачыстыбабыт тубуста. Бу кэнники сылларга 35-тэн тахса үрдүк кылаастаах мэдиссиинэ анал тэриллэрин ыллыбыт. Бу аппарааттар пациеннары аныгы таһымҥа чинчийэрбитигэр кыах биэрэллэр, — диэн онкодиспансер кылаабыйна бырааһа Татьяна Николаева этэр.

“Доруобуйа харыстабыла” национальнай бырайыак чэрчитинэн, онкодиспансерга өссө эбии микроскоп уонна эндовидеоскопическай комплекс кэлиэхтээх.

Ангелина Васильева, “Саха сирэ” хаһыат, edersaas.ru

Хаартыска: sakhagov.ru.

+1
0
+1
0
+1
0
+1
0
+1
0
+1
0
+1
0