Саха сирин олохтоохторун долгутар, нэһилиэнньэ өр күүппүт саҥа эбийиэгинэн искэни эмтиир киини тутуу буолара саарбаҕа суох. Киин биир эбийиэгэ – радиология отделениета саҥардыллан, сотору үлэҕэ киириэхтээҕэ уопсай кыһалҕа сорҕотун да быһаарыаҕа.
edersaas.ru
Ол да иһин, Саха Өрөспүүбүлүкэтин баһылыга Айсен Николаев алтынньы 27 күнүгэр өрөспүүбүлүкэ эмтиир тэрилтэлэрин кэрийэн көрөр кэмигэр радиология отделениетын саҥардыы үлэтин өссө күүһүрдэргэ (алтынньы 22 күнүнээҕи туругунан, тутуу 63 бырыһыана бэлэм этэ), бу сыл бүтүөр диэри үлэҕэ киллэрэргэ сорудахтаабыта. Манна даҕатан эттэххэ, кини өссө Медицина национальнай киинигэр, кардиология өрөспүүбүлүкэтээҕи диспансерыгар, Дьокуускай куораттааҕы клиническэй балыыһаҕа сылдьыбыта.
«Хомойуох иһин, кэнники сылларга ыарыһахтар радиология өҥөтүнэн туһаналларыгар өрөспүүбүлүкэ таһыгар тахсарга күһэллэллэр. Радиология отделениета быйыл аһыллара ыарыһахтар өрөспүүбүлүкэҕэ хаалан эмтэнэллэригэр дьоһуннаах хардыынан буолуоҕа дии саныыбын. Диспансер поликлиникатын уонна хирургия отделениетын үлэлиир усулуобуйалара эмтиир тэрилтэлэр нуормаларыгар эрэ буолбакка, сиэр-майгы, киһиэхэ киһилии сыһыан да ирдэбиллэригэр эппиэттээбэт. Онто да суох ыарахан ыарыыны утары охсуһар дьону маннык уустук усулуобуйаҕа эмтээһин өрөспүүбүлүкэҕэ таһаарыллыа суохтаах», – диэн билиҥҥи усулуобуйаны сатамньыта суоҕунан сыаналаата.
Диспансер быстах кэмҥэ атын сиргэ көһүөҕэ
СӨ баһылыга искэни эмтиир диспансер үлэлиир усулуобуйатын көрөн-истэн, салалта уонна үлэһиттэр санааларын истибитин түмүгэр, биир нэдиэлэ иһигэр диспансер поликлиникатын уонна хирургия отделениетын Дьокуускай к. клиническэй балыыһатыгар көһөрөр кыаҕы үөрэтэргэ быһаарда. Бу сорудаҕын бырабыыталыстыба бэрэссэдээтэлин солбуйааччы Ольга Балабкинаҕа, доруобуйа харыстабылын миниистирэ Елена Борисоваҕа, искэн диспансерын уонна клиническэй балыыһа кылаабынай быраастарыгар туһаайда. Оччотугар, искэни эмтиир диспансер тутуллар кэмигэр ыарыһахтар туһааннаах уонна суһал медицинскэй көмөнү сөптөөх усулуобуйаҕа ылар буолуохтара.
Тэҥнээн көрдөххө
Диспансер күн бүгүҥҥэ диэри медицинскэй көмөнү оҥорорго ханан да сөбө суох КПД дьиэҕэ үлэлии олорор. Маннык дьиэҕэ, биллэн турар, лифт суох, онто да суох кыараҕас балааталар тобус-толоруллар, ыарыһахтар уонна үлэһиттэр сип-синньигэс көрүдүөрүнэн сылдьаллар. Эпэрээссийэлиир хостор уонна көрүдүөрдэр кыараҕастара ыарыһахтары киллэрэргэ-таһаарарга кэккэ ыарахаттары үөскэтэллэр.
Саҥа тутууга эрэл улахан
Радиология эбийиэгэ баар сиригэр тутааччылар 2 670,84 кв.м. уопсай иэннээх 4 сыһыары тутууну ыыталлар. Радиология уопсайынан биэс блоктаах – поликлиникалаах, 30 куойкалаах сытар балыыһалаах, диагностика блоктардаах, сардаҥа терапията куорпустаах, быраас кэбиниэттэрдээх уо.д.а.
Оттон искэни эмтиир киин бэйэтэ 210 куойкалаах буолуоҕа. Саҥа киин поликлиниката, радиология отделениелаах сытар балыыһата уонна хаһаайыстыбаннай блога үс түһүмэҕинэн тутуллуохтара. Салгыы ядернай медициналаах диагностика киинэ, пансионат эбэтэр гостиница комплекса баар буолаллара былааннаналлар.
Манна эбэн эттэххэ, Айсен Николаев балаҕан ыйын 10 күнүгэр Владивостокка РФ Бэрэсидьиэнэ Владимир Путин бэрэссэдээтэллээх РФ Госсэбиэтин президиумун мунньаҕар искэни эмтиир киин өрөспүүбүлүкэ бүддьүөтүн уонна «Доруобуйа харыстабыла» национальнай бырайыагынан федеральнай үп суотугар тутуллуоҕун туруорсубута.
Дьокуускайга искэни эмтиир киин тутуллан үлэҕэ киирдэҕинэ, исписэлиистэр эмтээһин уонна олох хаачыстыбата тупсуоҕун, олох орто уһуна 2 төгүл уһуоҕун сабаҕалыыллар.
Кырдьыга да, табылыысса көрдөрөрүнэн, искэн курдук уодаһыннаах ыарыыттан инбэлииккэ тахсыы элбээһин өттүнэн уларыйа турар, сүрүннээн 2015 с. эмискэ улааппыт, олоҕу салҕыыр кэрэ аҥаардар ыалдьаллара аҕыйаабат. «Аныгы үйэ чуматынан» биллибит ыарыы ордук Аллайыаха, Алдан, Үөһээ Халыма, Эдьигээн, Нерюнгри уонна Ленскэй оройуоннарыгар өрө турбута бэлиэтэнэр.
Надежда ЕГОРОВА,«Саха сирэ» хаһыат, edersaas.ru
Мария ВАСИЛЬЕВА түһэриилэрэ
2010 с. | 2011 с. | 2012 с. | 2013 с. | 2014 с. | 2015 с. | 2016 с. | |
Куойка ахсаана | 140 | 120 | 148 | 145 | 147 | 147 | 155 |
Аан бастаан инбэлииккэ тахсыбыт дьон ахсаана | 693 | 742 | 815 | 723 | 765 | 1008 | 954 |
Дьахталлар ортолоругар: | 1036 | 1110 | 1104 | 1173 | 1171 | 1328 | 1227 |
Ол иһигэр, эмиий, оҕо үөскүүр сирин искэнэ | 152
132 |
203
141 |
212
173 |
242
181 |
236
176 |
251
175 |
237
211 |
Атын ыарыылары кытта тэҥнээтэххэ, искэҥҥэ тиксэр бырыһыана | 10,2 | 10,8 | 11,4 | 11,5 | 10,6 | 11,7 | 10 |