2013 сыллаахха Дьокуускайга OneClick Yakutsk платформа үлэтин саҕалаан, олохтоохтор дьиэлэриттэн тахсыбакка эрэ куораты тупсарыыга санааларын этэр, атах-бытах кыһалҕаларын быһаартарар кыахтаммыттара. Онтон ааспыт сылга платформа ыырын кэҥэтэн, билигин бырайыак өрөспүүбүлүкэҕэ барытыгар үлэлиир. Бырайыак үлэтин туһунан OneClick Yakutia салайааччыта Иван Степанов Саха информационнай ааҕыныстыбаҕа кэпсээбититтэн кылгатан таһаарабыт.
УСТУОРУЙАТТАН БЫҺА ТАРДАН
Цифровой технологиялар күүскэ сайдан, оннооҕор кытыы учаастактарга түргэн тэтимнээх интэриниэт холбонон, олохтоохтор араас киинэлэри, ханааллары онлайн көрөр буоллулар. Аныгы технологиялар олохпутун кытары тэҥҥэ хардыылаан, билигин эдэриттэн эмэнигэр диэри суотабайы, көмпүүтэри баһылаатылар. Смартфон нөҥүө күннээҕи кыһалҕабытын дьиэҕэ олорон, массыынанан айаннаан иһэн быһаарар кыахтанныбыт. Холобур, бырааска суруттарабыт, ас-үөл, таҥас-сап ыраах дойдулартан сакаастаан ылабыт. Ити эрэ буолуо дуо, аныгы технологиялар олохпутугар көмөлөрө хара баһаам.
2013 сылтан үлэлиир OneClick Yakutsk платформаҕа киирэн, олохтоохтор куораты тупсаран оҥорууга, ханнык уулуссалары өрөмүөннүөххэ наадатын сайаапкалаан, бэйэлэрин этиилэрин оҥорор буолбуттара. Платформаҕа киирбит сайаапкалары тута туһааннаах структураларга тириэрдэн, баар кыһалҕаны быһаарыыга үлэ ыытыллан барар.
НОРУОДУНАЙ ПОРТАЛ
Платформа киин куорат кыһалҕаларын быһаарыыга этэҥҥэ үлэлээн, аны билигин өрөспүүбүлүкэҕэ иккис портал – OneClick Yakutia былырыын ахсынньы ыйтан үлэлээн эрэр. Платформа салайааччыта Иван Степанов: “Бу сүҥкэн улахан сервис. Аан бастаан үлэлииригэр гражданнар сайаапка эрэ киллэрэр кыахтаахтара. Онтон билигин салаалара элбээн, өрөспүүбүлүкэ Ил Дарханын граныттан саҕалаан абитуриеннарга аналлаах сыһыарыылар баар буоллулар”, – диэн кэпсиир.
Билигин өрөспүүбүлүкэ куораттарын уонна сэлиэнньэлэрин олохтоохторо олохтоох көҕүлээһиннэри өйөөһүн, “Мин Сахам сирэ – 21 үйэҕэ”, “Олорор дьиэ уонна куорат эйгэтэ” бырагыраамалары интэриэһиргииллэрин кини этэр. Онон инникитин бу бэйэ-бэйэлэригэр майгыннаһар бырагыраамалары холбоон, OneClick Yakutia порталга «Төрөөбүт куоратым уонна сэлиэнньэм» (“Родной город и село”) диэн бырайыагынан киллэриэхтээхтэр.
Санатан эттэххэ, былырыын Сомоҕолоһуу сылыгар, тупсаран оҥоруу хайысхатынан 400 бырайыак олоххо киллэриллибитэ. Ол иһигэр спортивнай, оҕо былаһааккалара, искибиэрдэр уонна да атын тутуулар. Маны таһынан, араас арт-эбийиэктэр куораттарга, тыа сиригэр баар буоллулар.
Билигин платформа өрөспүүбүлүкэни барытын хабар буолан, муниципалитеттары кытары ыкса үлэлээн эрэр. Ол курдук, уопсастыбаннай бэрэстэбиитэллэри көрдүөҕэ.
«Биһигини кытары үлэлиэн баҕалаах дьону үөрэтэ сылдьабыт. Дьоҕус анкетирование ыытабыт. Онон инникитин бэрэстэбиитэллэрбит биһигини кытары араас кыһалҕалары быһаарыыга тэҥҥэ үлэлэһиэхтэрэ», – диэн Иван Степанов этэр. Бэрэстэбиитэллэр “Точка кипения – Якутск” курдук, “Сайдыы” диэн тыа сиригэр элбэх буолан үлэлиир сирдэри тэрийиэхтэрэ.
ИННИБИТ ДИЭКИ!
«Точка кипения – Якутск» икки сыллааҕыта, 2018 сылга балаҕан ыйыгар, аһыллыбыта. Икки сыл устата былаһаакка таһаарыылаахтык үлэлээн кэллэ.
«Уопсастыбаннай тэрилтэлэр, муниципальнай былаас уорганнара, урбаанньыттар, уопсастыбанньыктар бииргэ тыын суолталаах кыһалҕалары быһаарыыга үлэлиэхтэрэ, санааларын атастаһыахтара. Холобур, үлэнэн хааччыллыы боппуруоһа да буоллун, төрөөбүт дойдуларын тупсаран оҥоруу курдук да боппуруостарга. Биһиги эспиэрдэринэн хааччыйыахпыт, күүс-көмө буолуохпут”, — диэн Иван Степанов тыа сиригэр “Сайдыы” былаһааккаларын тэрийии туһунан санаатын эттэ.
Бу хайысхаҕа номнуо бастакы хардыылар оҥоһуллубуттар. Ол курдук, балаҕан ыйыгар Хаҥалас улууһун Тиит Эбэ сэлиэнньэтигэр бастакы “Сайдыы” былаһаакка аһыллыахтаах.
Түмүккэ платформа салайааччыта Иван Степанов OneClick Yakutia уонна «Точки кипения» бииргэ үлэлээн интэриэһинэй бырайыактары олоххо киллэриэхтэрин уонна уопсастыбаны бииргэ түмүөхтэрин туһунан эттэ.
edersaas.ru