“Өрөбүлгэ Соҕуруу Корея киин куоратыгар Сеулга дьаарбайан-күүлэйдээн кэлиэҥ” диэн эрдэ эппиттэрэ буоллар, олох итэҕэйиэм суоҕа этэ. Аан дойдуну көрөр баҕа санаа бэрт дьиктитик туолар кэмнээх эбит. Букатын даҕаны ол эрэ туһунан санаабакка сырыттахпына, дьылҕа бэлэҕин курдук бэйэтэ халлаантан түһэн кэлэн соһутта.
Үчүгэй сонун
Итинник соһуччу үөрүүнү бу дьыл муус устар 14 күнүгэр “Якутия” авиахампаанньа өрөспүүбүлүкэ олохтоохторугар бэлэхтээтэ. Санатар буоллахха, кулун тутар 25 күнүгэр Росавиация бу авиахампаанньаҕа ааспыт сыл сэтинньи ыйыгар киллэрбит дойдулар икки ардыларынааҕы көтүүлэри хааччахтааһынын уһулбута. Итинэн сибээстээн, муус устар 14 күнүттэн саҕалаан, бэс ыйын бүтүүтүгэр диэри кэмҥэ Сеулга нэдиэлэ аайы өрөбүл күн – сарсыарда 06.00 чаастан көтүөхтэрэ.
Соҕуруу Корея киин куоратыгар Сеулга “Якутия” авиахампаанньа “Боинг 737-800” сөмөлүөттэрэ сылдьыахтара. Биллэрин курдук, кыраныысса таһыгар айанныыр рейстэр регистрациялара үс чаас иннинэ саҕаланаллар. Дьокуускай-Сеул маршрут билиэтин сыанатын www.yakutia.aero. саайтарыгар киирэн көрүөххэ сөп. Саайт нөҥүө атыылаһарга билиэт сыаната агентствоттан ылардааҕар чэпчэки буолар.
Онтон от ыйын 1 күнүттэн балаҕан ыйын 30 күнүгэр диэри рейстэр оптуорунньукка уонна бээтинсэҕэ эмиэ оҥоһуллуохтара. Алтынньы 1 күнүттэн – эмиэ өрөбүл эрэ күҥҥэ.
Манна даҕатан бэлиэтээтэххэ, Соҕуруу Кореяҕа 60 күн сылдьарга Арассыыйа олохтоохторо виза оҥортороллоро ирдэммэт. Онтон уһун кэмҥэ барар буоллахха, эрдэттэн оҥорторор ордук.
Сэргэх айаҥҥа турунуу
Бу быйылгы бастакы айаҥҥа 170 пассажир ортотугар суруналыыстар уонна блогердар баарбыт. Сарсыарда 06.00 чааска көтүөхтээх сөмөлүөппүт чаас аҥаара курдук тардылынна. Ол авиахампаанньа буруйунан буолбакка, пограничниктар үлэлэрэ бытааныттан сылтаан. Көтүөх иннинэ бириэмэни түргэтэтэ таарыйа, аттыбытыгар олорор саха кыыһын кытта билистибит: Туйаара Сеулга магистратураҕа үөрэнэр дьүөгэтигэр биир нэдиэлэ ыалдьыттыы баран эрэр эбит. “Дьүөгэм ыҥырбыта ыраатта, ону бу кылгас уоппуска ылан, киниэхэ көтөн эрэбин. Кини уопсай дьиэҕэ олорор, оттон мин кыбартыыра куортамныам, аэропорка көрсүөхтээх. Билиэт да сыаната удамыр, виза наадата суох, туох да иэһим-күүһүм суох уонна тоҕо да бара сылдьыам суоҕай диэн бу бастакы рейскэ быһаарыммытым”.
…Сеулга 4,5 чаас көтүү биллибэккэ ааста. Бары да өрө көтөҕүллүбүт туруктаах буолан, утуйар киһи ахсааннаах: ким эрэ сурунаал ааҕар, ким эрэ төлөпүөнүгэр хасыһар, ким эрэ муусука истэр, ким эрэ оҕолорун кытта бодьуустаһар, оттон суруналыыстар үлэлэрин үгэнэ – күөх экран үлэһиттэрэ усталлар, биһиги сурунабыт.
Ыстаарсай бортпроводник-инструктор Владимир Бурнашев кэпсээбитинэн, кини манна 1999 сыллаахтан үлэлиир, 14 тыһыынча чаас көтүүлээх. Саха сирин олохтоохторо Сеулга сөбүлээн айанныылларын, экипаж ханнык баҕарар түбэлтэҕэ (тиэхиньиичэскэй, медицинскэй, психологическай уо.д.а.) мэлдьи бэлэмин бэлиэтиир. Бортпроводниктар анал үөрэҕи “Аэрофлот” үрдүк таһымнаах авиационнай оскуолатыгар бараллар эбит.
Сөмөлүөккэ аһатар астара минньигэс уонна тотоойу: ыраас ууну, чэйи, кофены таһынан, куурусса, эттэн кэтилиэт, ириис, хортуоппуй пюрета, сүбүөкүлэ салаата, лэппиэскэ, арыы, эклер.
Сакура тыллар кэмигэр
Инчхон аэропорка тиийэн түһэн, хас да бэрэбиэркэни ааһан (онно миграционнай каарта толороҕун), дуолларбытын корейскай вонаҕа уларыттыбыт. Биир күн сылдьарга 100 доллартан кырата суох харчы наада диэн эрдэттэн эппиттэрэ.
“Tourist Information Desk” диэн стойкаҕа тиийэн, Сеулга тугунан уонна хас сыанаҕа тиийиэххэ сөбүн ыйыттыбыт (бу өҥө босхо). Сорохторбут бастакынан тахса охсон, номнуо айаннаабыт буоланнар, хаалбыт уонча киһи 1,5 тыһыынча вона (биһиги харчыбытынан 600 солкуобай) төлөөн, оптуобуһунан бардыбыт. Сеулга тиийиэххэ диэри чаас устата айанныырга, Корея айылҕатын, дьиэлэрин-уоттарын астына-дуоһуйа көрөҕүн.
Биһиги тута Сеул киинигэр – Кёнбоккун дыбарыаска бардыбыт. Киириитин “тыыннаахтыы” уочараттаан биитэр терминал нөҥүө төлүөххэ сөп. Корейскай национальнай көстүүмү уларсан кэппиттэр уонна 65 саастарыттан үөһэ саастаах дьон босхо киирэллэр.
Императорскай дыбарыас хас да комплекстан турар: ХVI үйэтээҕи кэрэхсэбиллээх тутуулар, аһаҕас ааннарынан-үөлэстэринэн иһинээҕи киэргэтиилэрэ-оҥоһуулара үчүгэйдик көстөллөр. Онно баҕалаах сакураларбытын булан, хаартыскаҕа дуоһуйа түстүбүт.
Ол кэнниттэн Сеул аатырбыт улахан уулуссатыгар, Мёндоҥҥа, такси тутан бардыбыт. Бу манна араас астан-үөлтэн саҕалаан, табаар, таҥас-сап арааһа атыыланар улахан ырыынагар дьон илим хотоҕоһунуу тохтоло суох устар, чыпчылҕан түгэҥҥэ сүтэрсэн кэбиһиэххэ сөп, онон бэйэ-бэйэттэн тэйбэккэ, тутуһан сылдьар наада эбит. Итиэннэ харчыны сороҕун каартанан, сороҕун уу харчынан илдьэ сылдьар ордук эбит.
Ити курдук, аҕыйах чаас биллибэккэ ааста.
Киэһэ 20.00 чаастан метронан айаннаан, Инчхон аэропордугар чаас курдугунан тиийдибит. Ордубут корейскай харчыбытын төттөрү дуолларга уларыттыбыт.
Уонна регистрацияны ааһан, сөмөлүөппүтүгэр олордубут. Бу сырыыга айанньыттар бары ылы-чып баран, дойдубутугар тиийиэххэ диэри утуйдубут.
Сөмөлүөппүт Дьокуускайбытыгар түһээтин, Сеулга тиийэн түспүт түгэммитигэр курдук, ытыс тыаһынан эҕэрдэлэстибит, итинэн сиргэ этэҥҥэ үктэммит үөрүүбүтүн, экипажка махталбытын биллэрдибит. Төрөөбүт дойду күндүтүн!
Вера Макарова, «Саха сирэ» хаһыат, edersaas.ru
Ааптар хаартыскаҕа түһэриилэрэ.