Омук сириттэн кэлбит дьону, ПЦР анаалыстара биллиэр диэри, дьиэлэригэр хааччахтанан олороллоругар эбээһинэстээтилэр. Оннук уурааҕы Арассыыйа кылаабынай санитарнай бырааһа таһаарда.
Балаҕан ыйын 24 күнүттэн кыраныыссаны туораан кэлбит киһи үс күн иһигэр коронавируһу быһаарар ПЦР анаалыһы туттарыахтаах. Ону тэҥэ, үлэни биэрээччилэр маннык үлэһиттэрин анаалыс түмүгэ биллиэр диэри бэйэни хааччахтаныы эрэсиимин тутуһарын ирдиэхтээхтэр.
Бу миэрэни Арассыыйаҕа коронавируснай инфекциянан ыалдьыы ахсаана элбээн иһэриттэн күһэллэн, ылыннылар. Ааспыт сууккаҕа 7212 киһи ыалдьыбыт, оттон иллэрээ күн 6595 киһи этэ. Москваҕа суукка иһигэр 1560 киһи ыалдьыбыт, бэс ыйыттан ыла бачча элбэх киһи ыалдьа илик этэ. Ол иһин балаҕан ыйын 28 күнүттэн 65-тэн үөһээ саастаах уонна ыарыһах дьону дьиэҕэ олоруу эрэсиимин тутуһуохтаахтар, ону тэҥэ, кыаллар буоллаҕына, үлэһиттэри дьиэҕэ олорон үлэлэтии эрэсиимин киллэрэргэ быһаарыныы ылыннылар.
Арассыыйа ыалдьыбыт дьон ахсаанынан аан дойдуга 4-с, өлбүт дьон ахсаанынан 12-с миэстэлээх.
Үөрэх дьыла саҕаланан, дьон уоппускаттан кэлэн-баран уонна күһүҥҥү тумуу кэмэ буолан, коронавируснай инфекция эмиэ тарҕанан, “иккис долгун” кэлэрэ сабаҕаланар.
Ангелина Васильева, “Саха сирэ” хаһыат, edersaas.ru
Хаартыска: интэриниэттэн