Билигин ыарахан ыарыыларга туттуллар бүддьүөт суотугар атыылаһыллар эмп аҥаара Арассыыйаҕа оҥоһуллан тахсар препараттар. Бу туһунан Эргиэн уонна бырамыысыланнас министиэристибэтин салайааччы Денис Мантуров иһитиннэрдэ. Кини бэлиэтииринэн, бырабыыталыстыба тас дойдуттан кэлэр эмп оннугар хааччыйыы буолбакка, бу салааны урутаан сайыннарыы соруга турарын эттэ.
Миниистир ааттаабыт чахчытынан, бүгүҥҥү күҥҥэ ыарахан уонна сэдэх ыарыылары эмтээһин 43%-на дойдуга оҥоһуллар препараттар. «Биһиги бу салааҕа салгыы үлэлэһиэхпит. Чуолаан «Золгенсме» (аан дойдуга саамай ыарахан эмп) солбуйар эми «Биокад» эмп тэрилтэтэ оҥорон таһаарар. Билигин бу эмп клиническэй чинчийиини ааһар», — диэн Мантуров иһитиннэрдэ.
Арассыыйа эмин сыаната швейцарскай препараттааҕар биллэ чэпчэки буолуоҕа. Атын уустук ыарыылары эмтээһиҥҥэ эмиэ маннык тенденция көстөр.
— Сыл аайы дойду оҥорон таһаарар эмтэрэ бүддьүөккэ ороскуоту үөскэппэттэр. Үлэ маннык көрүҥүн салгыы да тэрийиэхпит, — диэн миниистир санаатын тиэртэ.
Санаттахха, бүгүн дьокутааттар Денис Мантуров кандидатуратын вице-премьер — РФ бырамыысыланнаска уонна эргиэҥҥэ миниистирэ дуоһунаска бигэргэтиэхтэрэ. Бу дуоһунас РФ бэрэсидьиэнин от ыйын 12 күнүнээҕи ыйааҕынан олохтоммута. Ол күн бырабыыталыстыба салайааччыта Михаил Мишустин РФ Конституциятын үлэлии турар редакцията ирдииринэн Госдуума көрүүтүгэр Денис Мантуров кандидатуратын киллэрбитэ. Бу иннинэ хандьыдааты Госдуума бары фракциялара уонна бырамыысыланнас сис кэмитиэтэ өйдөбүттэрэ.
Елена ПОТОЦКАЯ бэлэмнээтэ.
rg.ru саайтан.