Кулун тутар 27 күнүгэр Ил Дархан Айсен Николаев 2019 сылга өрөспүүбүлүкэ иһигэр баар тэрилтэлэр кэккэ хайысхаларынан кэлии омук дьонун үлэҕэ ылалларын бопсор, экэниэмикэ араас эйгэтигэр патент быһыытынан үлэлииллэрин тохтотор ыйаах таһаарда.
edersaas.ru
Холобур, омук дьоно архитектура, инженернай-тэхиньиичэскэй бырайыактааһын үлэтигэр, билим чинчийиитигэр, бухгалтерскай учуот, быраап эйгэтигэр киирэллэрэ бобулунна. Ил Дархан ыйааҕынан, омуктар ас астаан, утах оҥорон, таҥас тигэн атыылыыллара, куорат иһигэр-таһыгар оптуобуһунан, таксиинан дьону таһаллара, таһаҕас тиэйэллэрэ, доруобуйа, үөрэх эйгэтигэр үлэлииллэрэ хааччахтанна.
Уопсайа экэниэмикэ 33 көрүҥүнэн тыа, ойуур хаһаайыстыбатыгар, тутууга, атыыга-эргиэҥҥэ, гостиница өҥөтүгэр, хамсаабат баайы-дуолу атыылыырга, социальнай көмүскэлгэ омуктар үлэлииллэрэ аны тохтоото.
Ил Дархан бу ыйаах 115 №-дээх «РФ сиригэр-уотугар киирэр омук дьоно туох-ханнык балаһыанньалааҕын» туһунан федеральнай сокуоҥҥа сөп түбэһиннэрэн оҥоһуллубутун бэлиэтээтэ.
Дьиҥэр, Арассыыйа субъектарын кытта тэҥнээн көрдөххө, өрөспүүбүлүкэҕэ биир саамай үрдүк сыаналаах патент баар. Ону таһынан, омук дьоно үлэлии киирэригэр бэриллэр квота ахсаана сыл ахсын аҕыйыы турар.
Марианна Тыртыкова, «Саха сирэ», edersaas.ru