Омикронунан Америкаҕа биир күн иһигэр мөлүйүөнтэн тахса киһи сутуллубут
Америка Холбоһуктаах Шаттарыгар коронавирус омикрон-штамма дьаҥ сүрүннүүр сылтаҕа буолбутун туһунан биллэрэллэр.
Тохсунньу 4 күнүгэр тахсыбыт биллэрии этэринэн, Джон Хопкинс аатынан институт үлэһиттэрэ биир күн иһигэр 1 мөлүйүөнтэн тахса киһи ыалдьыбытын чахчылаабыттар. Бу сыыппараны атын доруобуйа харыстабылын тэрилтэлэрэ бигэргэтэ иликтэр эрээри, Хопкинс аатынан институт эрэллээх источник быһыытынан биллэр.
АХШ коронавирус хамсыгыттан ордук күүскэ эмсэҕэлээбит дойду буолар, коронавирус ыарыынан барыта 56 мөлүйүөн американец ыалдьыбыт, олортон 827,7 тыһыынчаттан тахса киһи өрүттүбэтэх.
Омикрон олус сыстыганнаах эрээри дельта штаммҥа холоотоххо, арыый “сымнаҕас” дьайыылаах көрүҥ диэн сабаҕаланар. Ол эрэн, Америка холобура доруобуйа харыстабылын систиэмэтэ ыарахан ноҕоруусканы көрсүбүтүн көрдөрөр – холобур, ахсынньы 21 күнүгэр Нью Йорк штатка 4452 балыыһаҕа киирбит эбит буоллаҕына, саҥа дьыл иннинэ — 8451 куойкаҕа сытар ыарыһах киирбитэ көстөр. Ол эбэтэр, сутуллуу тэтимэ хас да төгүл күүһүрбүт, онтон сылтаан ыарахан туруктаахтар ахсааннара икки төгүл элбээбит.
Аан дойду аптарытыаттаах чинчийээччилэрэ омикрон-штамм тарҕаныытын “вакцината суохтар хамсыктара” диэн ааттыыллар. Билиҥҥи кэмҥэ баар вакциналар саҥа штаммтан харыстыыр күүстэрэ мөлтөөбүтүн этэллэр эрээри, ыарыы ыарахан хаамыытыттан харыстыыр кыахтаахтара көстөр.
«Саха сирэ» хаһыат, edersaas.ru
Хаартыска interfax.ru