“Росздравнадзор” Арассыыйаҕа оҥоһуллубут, короанвирус “омикрон” штаммын булар тест-систиэмэни (анаалыһы) регистрациялаата диэн Федеральнай мэдиссиинэ-биологическай ааҕыныстыба (ФМБА) иһитиннэрэр. Бу анаалыһы ФМБА үлэһиттэрэ оҥорбуттар.
Анаалыс 1,5 чаас иһигэр коронавирус “омикрон” уонна “дельта” штаммнарын булар кыахтаах.
“Омикрон” штаммы Африкаҕа 2021 сыл сэтинньитигэр булбуттара. Ахсынньы бүтэһигэр 110 дойдуга баара биллибитэ. Бу вирус саҥа көрүҥэ “дельта” штаммнааҕар быдан сыстыганнааҕа уонна баар быһыыларга бэриммэтэ биллибитэ.
Ол эрээри, “омикрон” тарҕаммыт дойдуларыгар, Африкаҕа уонна Англияҕа коронавируһунан ыараханнык ыалдьыы түбэлтэлэрэ үс төгүл аҕыйаабыт. Онон, “омикрон” арыый чэпчэкитик ыарытар эбит диэн үөһээ тыыныахха сөп.
“Роспотребнадзор” салайааччыта Анна Попова иһитиннэрбитинэн, Арассыыайаҕа саҥа сыл бастакы нэдиэлэтигэр номнуо 300-тэн тахса киһи бу “омикроҥҥа” хаптарбыт. Доруобуйа харыстабылын миниистирэ Михаил Мурашко этэринэн, саҥа штамм тарҕаныыта мэдиссиинэ тэрилтэлэригэр улахан ноҕуруусканы оҥоруон сөп.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru