Доруобуйа

«Омикрон» штамм уратыларын туһунан өссө биирдэ…

Ковид ыарыы «Омикрон» штамма тарҕаныытын уонна хаамыытын туһунан саҥаттан саҥа иһитиннэриилэр элбииллэр. СӨ Роспотребнадзор управлениета «Омикроны» кытта сибээстээх аан дойдутааҕы балаһыанньаны кэтиир, наука уонна быраактыка түмүктэрин ырытан көрөн, маннык сүбэлэри биэрэр:

 

— «Омикроҥҥа» сыстан баран ыалдьар кэмэ кылгас. Барыллаан чахчынан, 2-5 хонук (ковидка 6-8 күн этэ).
— «Омикрон» штаммынан ыалдьыбыт киһи бастакы сууккатыгар номнуо сыстыганнаах буолуон сөп.
— COVID-19-тан харыстанан быһыы ылбыт эбэтэр ыалдьыбыт киһи «омикроҥҥа» сыстыан сөп. Ол гынан баран, үксүгэр респираторнай инфекция курдук -– кыратык кыраадыһа тахсыан уонна ОРВИ сибикилэрэ баар буолуон сөп.
— Саҥа штамм ыарыыны утары охсуһар күүстэрэ суох дьон ортотугар ордук тарҕанар.
— Кутталлаах бөлөххө кырдьаҕастар, харыстанар кыахтара мөлтөх, ааһан-араҕан биэрбэт ыарыылаах дьон киирсэллэр. Ааспыт штаммнары кытта тэҥнээтэххэ, «омикронунан» оҕолор элбэхтик ыалдьар буоллулар. Ити омук сирин чахчыларыттан көстөр.
— «Омикрон» инфекциятын тулалыыр эйгэҕэ, дьиэҕэ-уокка дезинфекциялыыр боростуой сириэстибэлэринэн өлөрүөххэ сөп.
— Штамм сыстар көрүҥнэрэ син биир урукку штаммнар курдук. Салгыҥҥа сылдьан сыстыахха сөп, ол эбэтэр ыалдьыбыт киһи айаҕыттан, муннуттан тахсар кырачаан хааппылалар да атын дьон салыҥнаах бүрүөлэригэр киирэр кыахтаах.
— «Омикрон» штамма элбэхтик уонна түргэнник тарҕанарынан сибээстээн, элбэх киһи тоҕуоруһар сиригэр сыстар куттал улахан.

Онон, СӨ Роспотребнадзор управлениета бэйэ уонна тулалыыр дьон доруобуйатын харыстыыр туһугар судургу да быраабылалары тутуһа сылдьарга сүбэлиир -– илиигитин сууна сылдьыҥ, маасканы кэтиҥ, антисептиктарынан туһаныҥ, дьон икки ардыгар дистанцияны тутуһуҥ, элбэх киһи тоҕуоруһар сиригэр сылдьартан туттунуҥ.

 

Надежда ЕГОРОВА, «Саха сирэ», edersaas.ru

 

0
1
Telegram @edersaas20