СӨ Доруобуйа харыстабылын министиэристибэтэ билигин нэһилиэнньэни долгутар ыйытыыларга хардарда.
edersaas.ru
- «Омикрон» штаммынан ыалдьыбыты биллэххэ, сүрүн дьайыылар ханныктарый?
— Эмтээһин дьайыылара Доруобуйа харыстабылын министиэристибэтин рекомендацияларыгар ыйыллаллар. Бэйэҕит билэргитинэн эмтэнэргит сатаммат!
-«Омикрон» штамм төһө сыстыганнааҕый?
— «Омикрон» штамм олус сыстыганнаах. Ковид-19 «омикрон» штаммынан ыалдьыбыт биир ыарыһах 100-кэ тиийэ киһиэхэ сыһыарыан сөп. Штамм уратыта -– ыалдьыбыт кэннэ 3-4 хонугунан ыарыы уустугуран барыан сөп. Атын штаммнарга тэҥнээтэххэ, хос ыалдьыы 5 төгүл элбэх буолуон сөп.
— «Омикронунан» ыалдьыбыты билэргэ туох ураты сибикилэр баалларый?
— Бу штамм ураты сибикитэ суох. Үгүстэр төбөлөрө ыалдьар, тумуулууллар, муннулара бүөлэнэр, ытырдаллар, күөмэйдэрэ кычыкыланар, сылайаллар, сэниэтэ суох буолаллар.
— Саха сиригэр оҕоҕо вакцина хаһан баар буолуой уонна хас сааһыттан ылыахха сөбүй?
— СӨ Доруобуйа харыстабылын министиэристибэтэ РФ Доруобуйа харыстабылын министиэристибэтигэр Спутник-М оҕо быһыытыгар наадыйарын туһунан сайаапканы түһэрдэ. Вакцина кэллэр эрэ, быһыыны поликлиникаларга ылыахха сөп буолуоҕа. Бу – урукку курдук Спутник V, ол гынан баран, биэриллэр өлүүтэ 5 төгүл кыччатыллыбыт.
— Онтон обургу оҕолорго?
Ковид ыарыыны утары быһыыны обургу оҕолорго биэрии баҕа өттүлэринэн, сокуоннай бэрэстэбиитэллэрин суругунан сөбүлэһиилэринэн оҥоһуллар. Кинилэргэ бэриллэр «Гам-Ковид-Вак М» (эбэтэр Спутник М) улахан дьон быһыытын курдук, ол гынан баран, бэриллэр өлүүтэ 5 төгүл кыччатыллыбыт.
— Билигин баар быһыылар «омикрон» штаммыгар төһө туһалаахтарый?
— Ыарыыны боспор миэрэлэри тутуһан уонна быһыыны кэмигэр ылан, коронавирустан уонна кини саҥа штаммыттан көмүскэниэххэ сөп. РФ доруобуйа харыстабылын миниистирэ Михаил Мурашко бэлиэтээбитинэн, быһыыны кэмигэр ыллахха уонна бастакы быһыы кэнниттэн 6 ыйынан ревакцинацияны аастахха, Арассыыйаҕа оҥоһуллубут быһыы «омикрон» штаммка туһалыыр.
— Бастакы быһыы кэнниттэн ревакцинацияны хас ыйынан барылларый?
— 6 ыйынан.
Надежда ЕГОРОВА, «Саха сирэ» хаһыат, edersaas.ru