Өскөтүн быыбар күнүгэр, кулун тутар 18 күнүгэр, бырапыыскаламмыт сиргэр кыайан тиийбэт буоллаххына, сайабылыанньа суруйан ханна баҕарар куоластыаххын сөп. Бүгүҥҥүттэн “Мин докумуоннарым”, Судаарыстыбаннай өҥөнү оҥорор порталга (www.gosuslugi.ru), Территориальнай киин хамыыһыйаҕа сайабылыанньаны биэрии саҕаланна.
Урукку сылларга быыбар күнүгэр бырапыыскаламмыт сирбитигэр суох буолар түгэммитигэр, “открепительнай” диэн ааттаах анал дастабырыанньа ылар этибит. Итини ылаары, үгүстэр бырапыыскалаах сирдэригэр барарга күһэллэллэрэ. Ити табыгаһа суоҕун ааһан, бэрт судургута суох эбээт. Ким билигин быыбардыам этэ диэн биир лоскуй кумааҕы туһугар ыйдааҕы хамнаһын ууран туран айанныаҕай? Онон итини барытын учуоттаан туран, Госдуума былырыын сокуоҥҥа уларытыылары киллэрбитэ.
Саҥа быраабыланан, өскөтүн быыбар күнүгэр бырапыыскалаах сирбитигэр суох буолар түгэммитигэр, ханна баҕарар сайабылыанньа суруйан быыбардыыр кыахтанныбыт. Сайабылыанньаны судаарыстыбаннай өҥөнү биэрэр анал сайтка эбэтэр “Мин докумуоннарым” нөҥүө, эбэтэр быыбардыыр хамыыһыйаҕа, учаастакка тиийэн суруйуохха сөп. Быыбардыыр учаастактарга сайабылыанньаны олунньу 25 күнүттэн саҕалаан тутуохтара. Сайабылыанньалары кулун тутар 12 күнүгэр диэри ылыахтара.
Сайабылыанньаҕа киһи аата-суола, ханна, хаһан төрөөбүтэ, ханна бырапыыскалааҕа, пааспарын дааннайдара, ханна куоластыан баҕарара ыйыллар. Быыбардыыр учаастактаргытын Быыбар киин хамыыһыйатын сайтыгар (www.cikrf.ru) киирэн көрүөххэ сөп.
Аграфена КУЗЬМИНА, “Саха сирэ” хаһыат, edersaas.ru