Саха сирин олохтоохторо олорор дьиэни гаастааһыҥҥа өрөспүүбүлүкэтээҕи бастакы субсидияны ылан эрэллэр.
Бырамыысыланнас сайдыытын ааҕыныстыбата Чурапчы улууһугар киирбит бастакы сайаапкалары ылынна. Ол эбэтэр олохтоохтор олорор дьиэни гаастааһыҥҥа туттубут 900 тыһыынча солкуобайтан үөһэ ороскуоттара толуйуллар буолла. Пилотнай нэһилиэнньэлээх пууннар олохтоохторугар көрүллүбүт субсидия 117 тыһыынча солкуобайга тиийэ толуйуллуоҕа.
— Гаастааһын элбэх оҕолоох ыалларга дьиэ кэргэн бүддьүөтүн кэмчилииргэ төһүү өйөбүлүнэн буолар. Бу олох хаачыстыбатын тупсуута уонна экология балаһыанньатын тупсарыы буолар. Онон бу үлэни салгыы ыытар сорук турар. Ил Дархан кэскиллээх көҕүлээһини өйүүр, — диэн бэлиэтээтэ СӨ бырамыысыланнаска уонна геологияҕа миниистирэ Максим Терещенко.
Субсидиянан туһаммыт дьон сыллааҕы хомунаалынай өҥөҕө хас да тыһыынча солкуобайы кэмчилиэхтэрэ. Оттон судаарыстыбаннай бүддьүөккэ 2024 сылтан 1 млрд солкуобай кэмчилэниэҕэ.
Бырагыраама чэрчитинэн 8 пилотнай нэһилиэнньэлээх пууҥҥа: Чурапчы улууһугар: Чурапчы сэлиэнньэтигэр уонна Дириҥ, Толоон Туора Күөл, Үрүҥ Күөл нэһилиэктэригэр, Горнай улууһугар Бэрдьигэстээх нэһилиэгэр, Бүлүү оройуонугар Эбэ нэһилиэгэр уонна Ленскэй куоракка 1 935 ыал хаһаайыстыбата гаас оттукка көһүөҕэ.
Елена ПОТОЦКАЯ «Саха сирэ» хаһыат.