Тупсаран оҥоһуллар эбийиэктэри талыыга дойду үрдүнэн онлайн-куоластааһын муус устар 26 күнүттэн саҕаланна.
edersaas.ru
Бу тэрээһин «Куоракка табыгастаах эйгэни оҥоруу» федеральнай бырайыак “Олорор дьиэ уонна куорат эйгэтэ” национальнай бырайыагын чэрчитинэн ыытыллар. Ыам ыйын 30 күнүгэр диэри za.gorodsreda.ru платформаҕа уонна «Госуслуги» порталга 14 сааһын туолбут уонна онтон үөһээ саастаах Арассыыйа гражданнара ханнык эрэ сир эбэтэр дизайн-бырайыак туһугар куоластыахтарын сөп.
Саха сирин 13 мунициальнай тэриллиилэрин олохтоохторо 24 уопсастыбаннай сирдэри тупсарыы бырайыактарыгар куоластыахтарын сөп. Куоластааһыҥҥа Алдан, Ленскэй, Мииринэй, Нерюнгри, Ньурба, Өлүөхүмэ, Покровскай, Дьокуускай куораттар, Айхал, Майа, Нам, Сунтаар, Чурапчы сэлиэнньэлэрин олохтоохторо кыттыыны ылаллар.
Муус устар 26 күнүгэр СӨ Бырабыыталыстыбатын премьер-миниистирэ Кирилл Бычков Арассыыйа Тутуу министиэристибэтин мунньаҕар видеоконференция көмөтүнэн кыттыыны ылбыта. Бу мунньахха 2022 сылга маҥнайгы уочаратынан тупсарыллар сирдэр испииһэктэрэ талыллыбыттара.
Кини бу киирбит сирдэр тустарыгар нэһилиэнньэ маҥнайгы күнтэн көхтөөхтүк куоластаан эрэрин этэр. РФ Тутуу уонна ОДьКХ миниистирин солбуйааччы Максим Егоров дьон көхтөөхтүк кыттарыгар эрэнэрин биллэрдэ.
«Саха сирэ» хаһыат, edersaas.ru
Хаартыска sakha.gov.ru