Олорон эрэ оонньуур волейболга Арассыыйа чөмпүйэнээтин пресс-конференцията буолла
Саха Өрөспүүбүлүкэтигэр спорт араас көрүҥнэрэ биллэ сайдан эрэллэр. Олимпийскай спорт көрүҥнэрэ эрэ буолбакка, паралимпийскай спорт араас көрүҥнэрин сайдыыта эмиэ көстөр. Ол курдук, 2008 сыллаахха олорон эрэ волейбол оонньооһуҥҥа Амма улууһун Покровка сэлиэнньэтигэр бастакы күрэхтэһии ыытыллыбыт буоллаҕына, быйыл биһиги өрөспүүбүлүкэбитигэр Бүтүн Арассыыйа чөмпүйэнээтэ ыытылынна.
Бүгүн, бэс ыйын 6 күнүгэр, профсоюз дьиэтигэр «олорон эрэ волейбол оонньооһуҥҥа» Арассыыйа чөмпүйэнээтин түмүгүнэн пресс-конференция ыытылынна. Кэпсэтиини спорт миниистирин бастакы солбуйааччы Семен Чердонов уонна адаптивнай спорт көрүҥнэрин федерациятын салайааччы Петр Давыдов ыыттылар. Пресс-конференцияҕа күрэхтэһии үрдүк таһымҥа ыытыллыбыта бэлиэтэннэ. Ол курдук, Арассыыйа чөмпүйэнээтин тэрийээччилэригэр, дьүүллүүр сүбэҕэ, тэрээһин үлэтигэр кыттыспыт, көмө буолбут дьоҥҥо, спонсордарга спорт миниистирин уонна адаптивнай спорт көрүҥнэрин федерациятын аатыттан махтал сурук туттарылынна. Ону таһынан, тэрийэр кэлэктиип уонна адаптивнай спорт көрүҥнэрин федерацията Саха Өрөспүүбүлүкэтин спордун министиэристибэтигэр махталларын биллэрдилэр, дьаныардаах үлэтин бэлиэтээтилэр.
«Олорон волейбол оонньуур» Арассыыйа чөмпүйэнээтин түмүгэ
I миэстэ — Свердловскай уобалас
II миэстэ- Москва уобалаһа (Подмосковье)
III миэстэ- Омскай уобалас
Анал наҕараадалар:
Бастыҥ оонньооччу — Виктор Миленин (Свердловскай уобалас)
Бастыҥ кимээччи — Андрей Моисеев (Москва уобалаһа)
Бастыҥ туруорааччы — Илья Плотников (Омскай уобалас)
Бастыҥ көмүскээччи — Никита Лобанов (СӨ)
Көрөөччүлэр биһирэбиллэрин ыллылар аҕалаах уол Евгений уонна Иван Пригодиннар.
Николай ПОПОВ, «Саха Сирэ» хаһыат, edersaas.ru