Олоҥхо иккис уон сылын бэлэмнээһиҥҥэ уонна ыытыыга өрөспүүбүлүкэ Национальнай тэрийэр кэмитиэтин мунньаҕа буолла

От ыйын 29 күнүгэр Айсен Николаев Саха Өрөспүүбүлүкэтин Ил Дарханын иһинэн Олоҥхо иккис уон сылын бэлэмнээһиҥҥэ уонна ыытыыга өрөспүүбүлүкэ Национальнай тэрийэр кэмитиэтин мунньаҕын ыытта. Тэрийэр кэмитиэт чилиэннэрэ үлэ түмүктэрин көрдүлэр уонна өрөспүүбүлүкэ эпическэй нэһилиэстибэтин харыстааһын тутаах боппуруостарын дьүүллэстилэр.

Кэпсэтии кэмигэр эпическэй нэһилиэстибэни харыстааһын бырагырааматын төннөрөр наадатын, хоту дойду аҕыйах ахсааннаах норуоттарын эпостарын харыстааһыҥҥа тэрийэр кэмитиэт боломуочуйатын кэҥэтэр туһунан этиилэр киирдилэр. Маны тэҥэ баар тэрилтэлэри салайыы биир кэлим тиһигин тэрийиини бэлиэтээтилэр.
Эрэгийиэн баһылыга “Олоҥхо дьиэлэрин” статустарын быһаарыыга баар итэҕэстэргэ тохтоото. “Муниципальнай оройуон баһылыга суолтатын өйдүүр уонна көмөлөһөр буоллаҕына, онно үлэ барар, оттон тэрилтэлэр суолталарын өйдөөбөт сирдэригэр дьиэлэр таах тураллар”, — диэн Саха сирин баһылыга бэлиэтээтэ.
Айсен Николаев федеральнай бүддьүөттэн Саха сирин норуоттарын эпостарын харыстааһыҥҥа тэрээһиннэри үбүлүүр кыах баарын толкуйдуурга тэрийэр кэмитиэт санаатын кытта сөпсөстө.

Эпическэй нэһилиэстибэни, ол иһигэр илиинэн суруллубут архыыбы сыыппаралааһыны (цифровизация) кэпсэтии интэриэһи тарта. “Бу дьоһун суолталаах уонна ураты сорук, илиинэн суруллубут, видео, аудио суруйуулары түргэнник сыыппараҕа тиһиэххэ”, — диэтэ Айсен Николаев уонна холобур быһыытынан Саха тылын улахан быһаарыылаах тылдьытын сыыппаралааһын туһунан санатта.

Мунньах кэмигэр СӨ Үөрэҕириитин уонна наукаҕа министиэристибэтигэр өрөспүүбүлүкэ идэтийбит орто үөрэх тэрилтэлэригэр Норуот үгэс буолбут дьарыгын кииннэрин тэрийэргэ этиилэри кылгас кэмҥэ быһаарарга сорудахтанна. Ону тэҥэ федеральнай, өрөспүүбүлүкэ, биэдэмистибэлэр уонна атын архыыптар фондаларыгар хараллан сытар саха норуотун эпическэй нэһилиэстибэтин докумуоннарын харыстааһыны уонна көдьүүстээхтик туһаныыны сиһилии ырыттылар.
Маны сэргэ мунньах кыттыылаахтара кэкэк тэрилтэлэр боломуочуйаларын, штаттарын, цифровой технологиянан тахсар аныгы хомуурунньуктары таһаарыыны, Борис Неустроев-Мандар Уус бырайыагынан туостан Моҕол ураһаны бэлэмнээһини уонна ону Таатта улууһун Баайаҕа нэһилиэгэр туруорууну дьүүллэстилэр.
Мунньахха Национальнай тэрийэр кэмитиэт бэрэссэдээтэлэ Александр Жирков, бэрэссэдээтэли солбуйааччы Евгения Михайлова, фольклор уонна култуура институтун профессора Василий Илларионов уо.д.а тыл эттилэр. Айсен Николаев тиһиктээх, кэлимсэ үлэ Саха сирин эпическэй нэһилиэстибэтин харыстааһыҥҥа, сайыннарыыга уонна тарҕатыыга көмөлөһүөҕэ диэн эрэлин биллэрдэ.

Саха Өрөспүүбүлүкэтин Ил Дарханын уонна

Саха Өрөспүүбүлүкэтин Бырабыыталыстыбатын пресс-сулууспата.