Олоҥхо тыйаатыра Платон Ойуунускай төрөөбүтэ 125 сылыгар анаммыт 11-с сезонун Грецияҕа арыйда. Андрей Борисов «Театральная визуализация эпоса народов России – Евразии» бырайыагын иһинэн тыйаатыр айана Драма, Лидия, Филиппы, Кавала уонна Тасос арыыга сырытта.
Драма куорат консерваториятын улахан саалатыгар Евросоюзтан экологическай бэстибээлгэ кытта кэлбит үөрэнээччилэрдиин көрүсһүү буолла. Манна артыыстарбыт оҕолорго тойуктаан иһитиннэрдилэр, хомуска оонньоотулар, алгыстан быһа тардыыны, саха таҥаһын көрдөрдүлэр. Араас дойдуттан мустубут оҕолор иһирэх көрсүһүүттэн астыннылар, норуоппут култууратыгар, үтүө үгэстэригэр сүгүрүйдүлэр. Маны таһынан, Драмаҕа Олоҥхо тыйаатырын артыыстара куорат күнүгэр анаммыт үөрүүлээх хаамыыга кытыннылар, Николай Мирликийскэй таҥаратын дьиэтигэр литургияҕа сырыттылар.
Олоҥхо тыйаатырын улахан суолталаах айана Платон Ойуунускай «Улуу Кудаҥса» испэктээгин сүрэхтэниитинэн түмүктэннэ. Көрөөччүлэр испэктээги Древнэй Греция драматыгар майгыннаттылар. Сүрүн оруоллары Дмитрий Алексеев, Василий Борисов, Дмитрий Хоютанов оонньоотулар.
edersaas.ru