Бүгүн, олунньу 1 күнүгэр, «Саха» НКИХ ханаалыгар 11.00 чаастан СӨ бырабыыталыстыбатын 2019 сыллааҕы үлэтин отчуоттаата.
2020 сыл сайыныгар Өлүөхүмэ улууһугар ыытыллаары турар Олоҥхо ыһыаҕар суол боппуруоһа хайдах быһаарылларын туһунан ыйытыы киирдэ.
Өлүөхүмэ авиа-пуордугар саҥардыллыы үлэтэ ыытылла турар буолан, бу сайын уунан суол күүскэ туһаныллара күүтүллэр.
Ыйытыыга СӨ бырабыталыстыбатын бэрэссэдээтэлин бастакы солбуйааччы Алексей Колодезников маннык эппиэттээтэ:
— 2019 сылтан өрөспүүбүлүкэ үрдүнэн барыта 16 авиа-пуорт саҥардыллара былааннанар. 2019 сылтан Дьокуускай, Нерюнгри куораттарын уонна Эдьигээн, Өлүөхүмэ улуустарын авиа-пуортарыгар саҥардыллыы үлэтэ саҕаланна. Өлүөхүмэ авиа-пуордугар өрөмүөн үлэтэ саҕаланан, көтөр балаһа устата 700 миэтэрэҕэ тэҥнэһэр, онон Ньурба улууһун нөҥүө көтөөһүн олохтонуоҕа. Балаһа устата 900 миэтэрэҕэ тэҥнэстэҕинэ, Л-410 сөмөлүөт сырыытын тэрийиэхпит.
Ньургуйаана Иванова, «Саха сир'» хаһыат, edersaas.ru
Василий Кононов хаартыската.