Олоҥхо күнүгэр Ньурба улууһун Чуукаар нэһилиэгэр куйаар ситиминэн олоҥхолортон быһа тардан, дьүһүүйүүлэри көрдөрдүлэр.
edersaas.ru
Бэрт сэргэх тэрээһин туһунан Култуура киинин уус-уран салайааччыта Лэкээрин Сэргэн бу курдук иһитиннэрдэ:
– Ырыа Дыгыйар “Тоҥ Саар Бухатыыр” олоҥхотуттан быһа тардан, олоҥхо кистэлэҥин арыйар, олоххо үөрэтэр тобулуулаах Е.М. Поликарпов аатынан “Эйгэ” норуот айымньытын уонна успуорт киинин үлэһиттэрин күүстэринэн турбут дьүһүйүү куйаар ситиминэн бэрт сэргэхтик буолан ааста.
Олоҥхоттон быһа тардан дьүһүйүүнү ютуб-ханаалбытыгар өрөспүүбүлүкэбит араас муннуктарыттан киирэн көрдүлэр, сэҥээрдилэр. Дьүһүйүү бүппүтүн кэнниттэн көрөөччүлэрбит бэйэлэрин санааларын тиэртилэр, хайҕаатыылар, биһирээтилэр. Араас этии, санаа атастаһыыта буолла. Ол курдук, туруорааччы көрөөччү иннигэр туруорбут соругун өйдөөбүт дьон санаата олус долгутта: “Дириҥ да ис хоһоонноох олоҥхо эбит… Соҕотох бухатыыр кыайбата, өлөөрү сытан айылҕаттан көрдөһөн Айыылар көмөлөһөн туран, кыайда!..
Айылҕаттан тэйимэҥ, саха дьоно!» диэн өйдөбүллээх эбит дии! Кырдьык, биһиги умнан эрэбит элбэҕи, туохтан да куттаммат болбуппут, сэт-сэмэ…”.
Бу курдук көрөөччү үрдүк сыанабылыттан ордук биһиэхэ күндү суох!
Елена ПОТОЦКАЯ, «Саха сирэ» хаһыат, edersaas.ru