«Олохтоох» тэлэбиисэрдэр «омуктары» солбуйуохтара дуо?

Бөлөххө киир:

Аан дойду үрдүнэн буола турар уларыйыылартан сылтаан, омук сирдэригэр оҥоһуллар бытовой тиэхиньикэлэр Арассыыйаҕа атыыга кэлиилэрэ  хайдах-туох буолуой диэн ыйытыы үгүс киһини үүйэ-хаайа тутар буолуохтаах.  Сыаналара төһө ыараата? Бүгүн тэлэбиисэр сыанатын билээри, Дьокуускайга баар «М-Видео” уонна “Телезавр” маҕаһыыннарга сырыттым.
“М-Видео” куорат киинигэр турар буолан, атыылаһааччы да, көрөөччү да элбэх, бытовой тиэхиньикэ да арааһа дэлэй. Сыананы тэҥнээри киирбит киһи буоларым быһыытынан тута атыылааччы кыыһы көрсөн, ханнык тэлэбиисэрдэр билигин хамаҕатык атыыга баралларын сурастым. Тас дойдулартан  ханнык тэлэбиисэрдэр атыыга хамаҕатык киирэллэин  ыйыталастым.
Онуоха Ксения диэн атыылааччы кыыс бу  сааскыттан “Самсунг” тэлэбиисэрдэри аҕалыы тохтообутун сырдатта. Арай, ордубут табаар тобоҕо билигин аахсыйанан арыый чэпчэтиллэн атыылана турарын эттэ. Ону сэргэ, «үрүҥ» бээтинсэнэн диэн аахсыйанан  Арассыыйаҕа оҥоһуллар «Hi”, “Телефункен” уонна “Витязь” диэн  тэлэбиисэрдэр атыылана туралларын кэпсээтэ. Ол курдук,  20 тыһ. солк иһинэн улахан экраннаах Арассыыйаҕа оҥоһуллубут “Телефункен” эбэтэр “Hi”  тэлэбиисэрдэри атыылаһыахха сөп эбит. Холобур, мин көрдөхпүнэ, аахсыйанан 44 999 тыһ. солк. Haier, Samsung диэн тэлэбиисэрдэр сыаналара 35 999 солкуобайга диэри түһэриллибиттэр.  Маны сэргэ, 80-тан 299 тыһ. солк диэри тиийэр сыаналаах, били, дьиэ эркинин саҕа тэлэбиисэрдэр кырыы-кырыыларынан анньыллан тураллар.
Салгыы тэлэбиисэр ийэтэ-аҕата баар сиригэр «Телезаврга” тиийдим. “Телезаврга” дьон эмиэ элбэх. Манна эмиэ чэпчэтиилээх аахсыйа буола турар. Саала ортотугар хаҥас диэки тэлэбиисэри кирэдьиит биэрэр сиргэ балачча уочарат үөскээбит. Дьэ, биир атыылааччы уол иллэҥсийбитигэр, удамыр сыанаҕа ханнык үчүгэй тэлэбиисэр баарын сурастым. Онуоха  уол миэхэ “Хсиоми”, “Хюндай” уонна кытайдар оҥорбут “TCL” тэлэбиисэрдэрин ыйан көрдөрдө. «Дойдубут оҥорон таһаарар тэлэбиисэрэ суох дуо?», — диэн сураспыппар, Арассыыйаҕа оҥоһуллар “StarWind” диэн тэлэбиисэр аахсыйаланан, 18 500  солк. атыылана турарын кэпсээтэ. Бу «StarWind» хампаанньа аҥаардас тэлэбиисэрдэри эрэ буолбакка, бытовой тиэхиньикэ арааһын оҥорор эбит. 2008 сылтан Арассыыйа ырыынагар биллибиттэр,  тас дойдуга бренд аатын ылбыт аарымалар үтүрүйэн,  улаханнык «аатырбакка» сылдьыбыттар.

«Омук тэлэбиисэрдэриттэн улахан атыннара суох, арай, Арассыыйаҕа оҥоһуллубуттар. Спутниковай антыанна көмөтүнэн бары ханаалы көрдөрөр кыахтаахтар. Хомойуох иһин, оннук антыанна суох, онон «Саха» НКИХ канаала кыайан көстүбэт», — диэн судургутук быһаарда. Оттон спутниковай антыанна сыаната бу маҕаһыыҥҥа 7 тыһ. солкуобай турар. Онон, мин көрдөхпүнэ, хата, ырыынагы Арассыыйаҕа оҥоһуллар бытовой тиэхиньикэлэр  баһылыыһыктар диэн сылыктаатым. Бэлиэтээн эттэххэ,  тэлэбиисэр эрэ буолбакка,  ырыынакка Арассыыйаҕа оҥоһуллар холодильниктар, духуопкалаах оһохтор  кыралаан   эрэллээхтик кимэн киирэн эрэллэрэ үөртэ.

Ааптар хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0