Ааспыт нэдиэлэҕэ Чурапчы улууһун дьаһалтата Урбаан, эргиэн уонна туризм министиэристибэтин, Урбааны өйүүр киини, Бааһынай хаһаайыстыбалар уонна кэпэрэтииптэр ассоциацияларын кытары Чурапчы сэлиэнньэтигэр тэрийэн ыыппыт “Бэйэбит аспытын талабыт” диэн олохтоох табаары оҥорооччулар зонатааҕы форумнарыгар 200 киһи, уон икки улуус бэрэстэбиитэллэрэ кытыннылар.
edersaas.ru
Форумҥа толоруулаах былаас уорганнарын кытары үлэ көдьүүһүн үрдэтиигэ киэҥ кэпсэтии тэрилиннэ, кэмиэрчэскэй баан исписэлиистэрэ уонна экспертэр нолуок эйгэтигэр, хонтуруол-хаасса тиэхиньикэтин туһаныыга элбэх сүбэни оҥордулар.
Тыа хаһаайыстыбатын табаарын оҥорууга анаммыт “төгүрүк остуолга” тыа хаһаайыстыбатын миниистирин солбуйааччы Николай Афанасьев бааһынай хаһаайыстыбалар баһылыктарын уонна кэпэрэтииптэр бэрэстэбиитэллэрин элбэх ыйытыыларыгар сиһилии хоруйдаата. Онон сири түүлэһии, нолуокка киирбит саҥа уларыйыылар, “Меркурий” ситимҥэ киирии итиэннэ кэлэр 2019 сылга судаарыстыба өйөбүлүгэр, бааһынайдар граннарыгар туох уларыйыылар киирэллэрин о.д.а. туһунан киэҥ кэпсэтии таҕыста.
Урбаан, эргиэн уонна туризм миниистирин солбуйааччы Максим Прокопьев салайбыт “төгүрүк остуола” судаарыстыба өйөбүлүн ырычаахтарын сырдатыыга ананна. Эрэгийиэннээҕи лизинг хампаанньатын генеральнай дириэктэрэ Татьяна Бравина үлэ тэрилин, тиэхиньикэтин лизиҥҥэ ылыы уратыларын, Урбааны өйүүр киин генеральнай дириэктэрэ Зоя Седалищева бу киин кэлим иһитиннэрэр-сырдатар үлэтин туһунан кэпсээтилэр. Биирдэм тэрилтэ тэринэн декоративнай-прикладнай ускуустуба эйгэтигэр үлэлиир уустар, иистэнньэҥнэр саҥа саҕалыыр урбаанньыттарга кирэдьиити удамыр бырыһыаҥҥа уонна икки-үс ыйынан, кыаҕын арыый ылбытын кэннэ, төлөтөр ордугун бэлиэтээтилэр.
Наталья Иванова маастар-кылааһыгар араас улуустартан түмсүбүт эдэр кондитердар тортары уонна пирожнайдары астааһын кистэлэҥнэригэр үөрэннилэр. Форум түмүгүнэн олохтоох табаары оҥорууну уонна эргитиини сайыннарыыга киирбит этиилэринэн резолюция ылылынна, Эрэгийиэннээҕи лизинг хампаанньата Чурапчы улууһун дьаһалтатын кытары бииргэ үлэлээһин дуогабарын түһэристэ.
Раиса Сибирякова, «Саха сирэ» хаһыат.