Олохтоох салайыныы боппуруостарыгар Ил Түмэн Судаарыстыбаннай Дуумаҕа тоҕус этиини ыытыаҕа
Бүгүн, олунньу 15 күнүгэр, Ил Түмэн XXXIV уочарата суох пленарнай мунньаҕар олохтоох салайыныыга туһуламмыт федеральнай сокуон барылыгар Саха сириттэн этиилэри киллэриини көрдүлэр.
Санатан эттэххэ, бу боппуруоһу ааспыт нэдиэлэҕэ олунньу 10 күнүгэр Ил Түмэн судаарыстыбаннай тутулга уонна олохтоох салайыныыга сис кэмитиэтин мунньаҕар дьокутааттар, улуус, нэһилиэк баһылыктара, дьокутааттара сиһилии ырыппыттара. Пленарнай мунньахха уон улахан этии киирбититтэн дьокутааттар тоҕуһун бигэргэттилэр. Сис кэмитиэт бэрэссэдээтэлэ Владимир Прокопьев бэлиэтээбитинэн, мунньах түмүгүнэн ырытыһыы кэнниттэн уларытыылары киллэрииттэн бастакы пуунун ылан туран, пленарнай мунньахха сүрүн тоҕус улахан уларытыыны киллэрбиттэр.
Норуот дьокутааттара федеральнай сокуон барылыгар уларытыылары киллэриигэ эрэгийиэн уратытын учуоттааһыҥҥа, муниципальнай, куорат уокуруктарын тэрийиигэ кыраныысса, сир-уот о.д.а. боппуруостарын эрэгийиэн бэйэтин сокуонунан салайтарарын ситиһиигэ болҕомтолорун хатаатылар. Ону сэргэ дьокутааттар сокуон барылын 84-с ыстатыйатыгар ыйыллыбыт сорох сирдэргэ (Арктическай зонаҕа, Уһук Хоту сиригэр-уотугар уо.д.а. баар) олохтоох салайыныы тэрийии уратытын бигэргэтэри РФ субъегын кытта хайаан да сөбүлэһиннэрэри туруорсаллар.
Уопсай түмүккэ норуот дьокутааттара бу уларытыылары киллэриини өйөөтүлэр. Онон олохтоох салайыныы реформатыгар Саха сириттэн Судаарыстыбаннай Дуумаҕа тоҕус улахан этии барыаҕа. Бу туһунан сиһилии “Саха сирэ” хаһыат олунньу 17 күнүнээҕи нүөмэригэр ааҕаарыҥ.
Аграфена КУЗЬМИНА