Олохтоох оҥорон таһаарыыны өйүүр фонда аны сайыҥҥыттан үлэлиэ
Инвестицияны сайыннарыы уонна предпринимателлээһин министиэристибэтэ ахсынньы 12 уонна 13 күннэригэр Инновация менеджменин үрдүкү оскуолатыгар улуустар баһылыктарын экономическай блокка, чуолаан тастан үбү-харчыны тардыыга уонна предпринимателлээһиҥҥэ, солбуйааччыларыгар уонна предпринимателлэр түмсүүлэрин салайааччыларыгар анаан мунньах тэрийэн ыытар.
edersaas.ru
Маҥнайгы күн партнер-сессияҕа миниистири бастакы солбуйааччы Евгений Ноговицын муниципальнай тэриллиилэргэ олохтоох оҥорон таһаарыыны сайыннарыы, дьоҕус уонна орто предпринимателлээһин субъектарыгар өйөбүл, Бизнес-климаты үөскэтии уонна инновацияны киллэрии департаменын сүрүн исписэлииһэ Мичил Егасов бизнеһи үлэлэтиини судургутутар тус сыаллаах моделлар, Инвестиция бэлиитикэтин уонна үбү тардыы департаменын үбү тардыыга, маркетиҥҥа секторын салайааччыта Василий Соловьев инвестиция бэлиитикэтин тустарынан сиһилии билиһиннэрдилэр, ол кэнниттэн “Якутия” венчурнай хампаанньа, “Якутия-Технопарк”, Бизнес-оскуола, Бизнес-инкубатор, Инвестицияны сайыннарыы агентствотын, предпринимателлээһини өйүүр киин уонна фонда салайааччылара, бэрэстэбиитэллэрэ тыл эттилэр.
Евгений Ноговицын быһаарарынан, маннык тэрээһин өрөспүүбүлүкэҕэ аан маҥнай ыытыллар итиэннэ сыл түмүгүн таһаарар, үүнэр сылы торумнуур, улуустары кытта үлэни биир сүрүннүүр соруктаах. “Ил Дархан дьаһалынан улахан болҕомто олохтоох оҥорон таһаарыыны сайыннарыыга ууруллар. Бу хайысханы өйүүр фонданы венчурнай хампаанньа базатыгар үүнэр сыл иккис кыбаарталын бүтүүтүгэр арыйаргы былаанныыбыт”, — диир Евгений Алексеевич. Бүгүҥҥү партнер-сессияҕа барыта 25 улуустан кытыннылар.
Сарсын эмиэ Инновация менеджменин үрдүкү оскуолатыгар муниципальнай оройуоннарга олохтоох оҥорон таһаарыыны сайыннарыыга анаан бөлөхтөрүнэн сессия ыытыллыа. Ол кэнниттэн ыалдьыттар “Макспроф”, “Металлком” производственнай базаларга, “Сладкие мечты”, “Камелек” сыахтарга сылдьан уопут атастаһыахтара.
Василий НИКИФОРОВ, «Саха сирэ» хаһыат, edersaas.ru