«Олохтоох култуура дьиэтэ» анал бырайыак көдьүүстээҕин көрдөрөн эрэр

«Биир Ньыгыл Арассыыйа» баартыйа «Олохтоох култуура дьиэтэ» диэн анал бырайыак дойду үрдүнэн көдьүүстээҕин көрдөрөн эрэр. Ити анал бырайыагынан култуура саҥа эбийиэктэрэ тутуллан үлэҕэ киирэллэрин нэһилиэнньэ көрө-билэ сылдьар. Бу туһунан «Олохтоох култуура дьиэтэ» бырайыагы федеральнай таһымҥа сүрүннээччи Госдума култуураҕа кэмитиэтин бэрэссэдээтэлэ Ольга Казакова селекторнай мунньаҕар эттилэр.

Ольга Казакова бэлиэтээбитинэн, федеральнай бүддьүөттэн 1 млрд 400 мөл. солк тыырыллыбыт, манна эбии регионнар, муниципалитеттар кыттыбыттарын түмүгэр, ити суума 2,5 млрд. солк тиийбит.
«Бырайыак көдьүүстээҕин толору көрдөрдө. Бастакытынан, манна кыттар бэрт судургу. Норуот бэйэтин баҕа өттүнэн кыттыбыта олус махталлаах. Маны олоххо киллэриигэ аҥардас бүддьүөт эрэ үбэ буолбакка, биирдиилээн меценаттар эмиэ кытыннылар», – диэн кэмитиэт салайааччыта санаатан үллэһиннэ.
РФ Култуураҕа министиэристибэтин дааннайынан, 71 регионтан бырайыакка 40-тан тахсата кыттан, ылыммыт былааннарын олоххо киллэрбиттэр эрээри, сэттэ регион кыаммакка олороро этилиннэ.

Селекторнай мунньахха Саха сириттэн СӨ норуодунай дьокутаата, «Олохтоох култуура дьиэтэ» бырайыагы Саха сиригэр сүрүннээччи Ольга Балабкина: «Олус наадалаах бырайыак буолар. Нэһилиэктэргэ култуура дьиэлэрин оруоллара олус улахан. Саха сиригэр сүрүн баартыйа бырайыага үлэтин саҕалаан, барыта этэҥҥэ олоххо киирэн эрэр. СӨ Култуура министиэристибэтин кытта үлэ этэҥҥэ барарын хонтуруоллуохпут» – диэн эттэ.
Владислав Левочкин, СӨ култуураҕа миниистирин 1-кы солбуйааччы:
– Бырайыакка кыттар улуустар, нэһилиэктэр дьаһалталарыгар атырдьах ыйыгар көрүллүбүт үп барыта тиэрдиллибитэ. Култуура дьиэтигэр наадалаах кириэһилэлэри, тыас-уус, уот оборудованиеларын атыылаһыы бытааннык барар туруктаах. Атыылаһыы куонкуруһа сорохторго түмүктэнэ илик. Ол эрээри, барытын хонтуруолга тутан олоробут.

* * *
«Биир ньыгыл Арассыыйа» баартыйа анал бырайыага быйылгыттан саҕаланан аны икки сылынан түмүктэниэхтээх.

Александр ТАРАСОВ, «Саха сирэ» хаһыат, https://edersaas.ru