«Олохтоох каадыры – бырамыысыланнаска» бырайыак сонун хайысханан сайдар буолла.
edersaas.ru
Бу туһунан Бырабыытылыстыба Бэрэссэдээтэлин бастакы солбуйааччы Кирилл Бычков тустаах министиэристибэлэр уонна биэдэмистибэлэр салайааччыларын уонна муниципальнай тэриллиилэр баһылыктарын кытта селекторнай мунньахха ырытта.
Сүрүн болҕомто сыстыганнаах дьаҥ өрө туруутун кэмигэр тутуу уонна суол хаһаайыстыбатын салааларын үлэһиттэринэн хааччыйыыга уурулунна.
— «Олохтоох каадыры — бырамыысыланнаска» бырайыак сүнньүнэн промышленнай салааҕа өрөспүүбүлүкэ 16000 олохтооҕо үлэ булла. Бу бырайыак хайысхатын экэниэмикэ атын салааларыгар: тутууга, суол хаһаайыстыбатыгар, энергетикаҕа уонна тырааныспарга кэҥэтиэхпит. Эһиги санааҕытын истэн баран, бу бырайыагы олоххо киллэриигэ «Дорожнай каарта» оҥоруохпут, — диэн бэлиэтээтэ Кирилл Бычков.
Үлэһит илии тиийбэтинэн, билиҥҥи кэмҥэ үлэтэ суох дьон учуоттарыгар турар , сарбыллыыга түбэһээри сылдьар дьону хомуйуу бара турар. Бары салааларга анал үөрэҕи баһылаабыт исписэлиистэри үлэлэтэр сыалтан наадалаах идэлэргэ эбии үөрэхтээһин тэрилиннэ. Холобура, тутуу салаатыгар 151 киһи кылгас болдьоххо биэс орто анал үөрэхтээһин тэрилтэлэригэр үөрэнэн баран, тутуу эбийиэктэригэр быраактыкаларын бара сылдьаллар. Анал идэлээх каадырдары үөрэтии салҕаныаҕа. Маны таһынан, сайыҥҥы кэмҥэ тутааччылар устудьуоннар уонна ыччаттар этэрээттэрин көмөлөрүн туһаныахтара.
Сүрүн сорук — өрөспүүбүлүкэ таһыттан кэлэр үлэһиттэри олохтоох кадырынан солбуйуу. Мунньах түмүгэр Кирилл Бычков «Олохтоох каадыры —бырамыысыланнаска» суолталаах бырайыак саҥа пааспарын бигэргэттэ.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Мария Васильева түһэриитэ.