«Олохтоох каадырдары бырамыысыланнаска» бырайыак бастыҥ кыттааччылара ааттаннылар
«Олохтоох каадырдары бырамыысыланнаска» дьоһун суолталаах уонна киэҥ хабааннаах бырайыак өрөспүүбүлүкэҕэ хайыы үйэ бэһис сылын олоххо киллэриллэр. Бырайыак чэрчитинэн өрөспүүбүлүкэ олохтоохторо бырамыысыланнас сүрүн тэрилтэлэригэр үлэҕэ ылыллаллар.
«Бу бырайыак биһиги экэниэмикэбитигэр мультипликативнай көдьүүстээх эрэ буолбатах, ону таһынан олохтоохтору уонна экэниэмикэҕэ бигэ туругу көҕүлүүр. Дьоһун суолталаах бырайыак олоххо киириэҕиттэн 36 тыһыынчаттан тахса олохтоох каадыр үлэлээх буолла. Өрөспүүбүлүкэ баһылыга Айсен Николаев 2024 сылга диэри Саха сирин 33 тыһыынчаттан тахса олохтооҕун үлэҕэ ыларга сорук туруорбута ситиһиилээхтик толоруллар. Ылыллыбыт сыалы-соругу ситиһэргэ бэйэлэрин үлэлэринэн көмөлөһөр, биһиги эрэгийиэммитин үлэлииргэ уонна олорорго кэскиллээх оҥорор бырайыакка кыттыбыт хампаанньаларга улахан махталбын биллэрэбин», -– диэн өрөспүүбүлүкэ бырабыыталыстыбатын бэрэссэдээтэлин бастакы солбуйааччы Кирил Бычков «Олохтоох каадырдары бырамыысыланнаска» бырайыак бастыҥ кыттааччыта» сыл аайы ыытыллар куонкурус 2021 сыллааҕы түмүгүн таһаарыыга эттэ.
Ол курдук, бастыҥнарынан «Колмар» чоҕу хостуур хампаанньа, «АЛРОСА» публичнай акционернай уопсастыба, «Якутуголь» ХК АУо ааттаннылар.
Кыттааччылар үлэлэрин сыаналыырга, бастатан туран, учуоттаннылар:
— олохтоох нэһилиэнньэни үлэҕэ ылыы уонна бастайааннай төрүөккэ хаалларыы ылар бырыһыана;
— эдэр исписэлиистэргэ стажировканы тэрийии;
— дьарыктаах буолуу сулууспата идэҕэ үөрэттэрбитин кэнниттэн үлэҕэ ылыы;
— бырайыагы олоххо киллэрии туһунан сонуну киэҥник тарҕатар сириэстибэлэргэ сырдатыы.
Надежда ЕГОРОВА, «Саха сирэ», edersaas.ru