Бу күннэргэ норуот көҕүлээһининэн ыытыллар бырайыактар куонкурустарыгар киирбит докумуоннары үөрэтии ыытыллар. Быйылгы куонкуруска уопсайа 476 сайаапка киирдэ.
— 2020 сыл ахсынньы 29 күнүгэр куонкуруска кыттар бырайыактар докумуоннарын ылыы түмүктэммитэ. Куорат уонна өрөспүүбүлүкэ улуустара, Арктическай оройуоннар субсидияны тыырыыга биир тэҥник кытталларын ситиһэр инниттэн куонкурус «Үс түннүк» көрүҥҥэ араарыллан ыытылынна. Онно нэһилиэнньэ ахсаана учуоттанна.
Куонкурус «1-кы түннүгэр» 338 муниципальнай тэриллии киирдэ. Манна Алдан, Амма, Үөһээ Бүлүү, Бүлүү, Горнай, Кэбээйи, Ленскэй, Мэҥэ Хаҥалас, Мииринэй, Нам, Нерюнгри, Ньурба, Өймөкөөн, Өлүөхүмэ, Сунтаар, Таатта, Томпо, Уус Аллан, Уус Маайа, Хаҥалас, Чурапчы улуустарын муниципальнай тэриллиилэрэ күөн көрсөллөр.
«2-с түннүккэ» 8 муниципальнай тэриллии: Алдан, Айхал, Бүлүү, Ленскэй, Мииринэй, Удачнай, Нерюнгри, Өлүөхүмэ куораттара уонна Жатай, Дьокуускай куораттааҕы уокуруктар киирдилэр. «3-с түннүккэ» арктическай улуустартан 97 муниципальнай тэриллии киирдэ. Ол курдук, манна Абый, Үөһээ Халыма, Дьааҥы, Эдьигээн, Муома, Өлөөн, Орто Халыма, Эбээн Бытантай, Аллайыаха, Анаабыр, Булуҥ, Аллараа Халыма, Усуйаана улуустарыттан муниципальнай тэриллиилэр күөн көрсүөхтэрэ. Бу тэрээһиҥҥэ
СӨ судаарыстыбаннай бүддьүөтүгэр 2021 сылга 500 мөл. солк көрүллүбүтэ. Муниципальнай тэриллиилэр куонкуруска кыттарга киллэрбит бырайыактарын суумата 986,8 мөл. солк. Куонкурус түмүгэ олунньу саҥатыгар биллиэҕэ, — диэн СӨ үбүн миниистирэ Валерий Жондоров иһитиннэрдэ. Дьэ, онон сотору кэминэн номнуо дьон биһирэбилин ылбыт норуот көҕүлээһинин бырайыактарын куонкуруһугар ханнык муниципальнай тэриллиилэр кыайан, бэйэлэрин бырайыактарын олоххо киирэллэрэ быһаарыллыаҕа.
Елена ПОТОЦКАЯ Саха сирэ хаһыат, edersaas.ru