1985 сыллаахха өрөспүүбүлүкэ орто оскуолаларын бүтэрбиттэр “Олоххо анал” кинигэлэрин сүрэхтээтилэр
Ахсынньы 15 күнүгэр кинилэр «Ника” банкетнай саалаҕа муусука тыаһыгар уйдаран киирээттэрин кытары, ыраах хаалбыт эдэр саас ырыалара дууһаны сайа охсон киирдилэр. Бырааһынньыктыы киэргэммит киэҥ, сырдык, ыраас саалаҕа өрө көтөҕүллүбүт сирэйдэр, үөрүүнэн мичилиһэр харахтар киһини эрэ долгуттулар.
edersaas.ru
Бу 1985 сыллаахха өрөспүүбүлүкэ орто оскуолаларын бүтэрбиттэр уочараттаах тэрээһиннэригэр, о.э. түмсүү историятыгар бастакы кинигэ-альбом сүрэхтэниитигэр сааланы толору киһи муһунна.
Оскуолаларын бүтэрбиттэрэ 35 сыллаах үбүлүөйүн көрсө күн сирин көрбүт «Олоххо анал» диэн ааттаах кинигэ-альбомҥа 35 киһи олоҕо, үлэтэ-хамнаһа сырдатылынна. Кинигэ-альбомҥа уран тарбахтаах, сэдэх идэлээх, олох ыарахаттарын утары күүстээх санаанан охсуспут, үлэҕэ ситиһиилээх, тыа сирин боростуой үлэтин уһансааччы уо.да. үөлээннээхтэрин тустарынан элбэҕи уонна интэриэһинэйи булан ааҕыахха сөп.
1985 сыллаахтар түмсүүлэрэ төрөөбүт ыйдарынан биирдии улахан тэрээһини ыыталлара үгэскэ кубулуйда. Бу ыйга ахсынньы ыйдааҕы Охчут бэлиэлээхтэр тэрийэн ыыталлар. Ый саҕаланыытыгар ытыыга спортивнай күрэх олус тыҥааһыннаахтык буолан ааспыта.
Бүгүн Охчут бэлиэлээхтэр биир үөлээннээхтэрин үйэтитэн, бастакы кинигэ-альбомнара сүрэхтэннэ. Салгыы серия быһыытынан таһаараары, иккис кинигэлэригэр үлэлэрин саҕалаатылар. Аны саас эмиэ оскуоланы бүтэрбит 35 киһи олоҕун кэпсиир матырыйааллар мунньуллаллар.
Өрө көтөҕүллүүлээх муусука доҕуһуолунан кинигэ таһа ойуулаах, уотунан оонньуур чүмэчилэрдээх улахан торду дохсун ытыс тыаһынан көрүстүлэр. Сыанаҕа махтал тыллара этилиннилэр, ырыа тойук дьиэрэйдэ.
Түмсүү бастакы кинигэтигэр киирбит маҥнайгы хараҥаччылар сыанаҕа ыҥырыллан, сабыс саҥа бэчээттэнэн тахсыбыт кинигэлэрин туттулар.
Кинигэ-альбом «Көмүөл» кинигэ кыһатыгар таҥыллан таҕыста. Түгэнинэн туһанан, салайааччы Борис Павловка махталларын тириэртилэр.
Надежда ЕГОРОВА, “Саха сирэ”, edersaas.ru