Кулун тутар 10 күнүгэр Өксөкүлээх Өлөксөй аатынан Норуоттар доҕордоһууларын дьиэтигэр «Олох устун ырыанан» (“С песней по жизни”) ыллыыр дьиэ кэргэттэргэ норуоттар икки ардыларынааҕы өрөспүүбүлүкэтээҕи бэстибээл ыытыллыа.
Аан бастаан ыытыллар маннык бэстибээли СӨ Гражданскай уопсастыбаҕа институтун сайыннарыыга министиэристибэ уонна Өксөкүлээх Өлөксөй аатынан Норуоттар доҕордоһууларын дьиэтэ көҕүлээтилэр.
Бэстибээл дьиэ кэргэн үгэстэрин уонна сыаннастарын, дьиэ кэргэни ырыа, айар дьарык көмөтүнэн сомоҕолуур, үүнэр көлүөнэни иитиигэ айар куттаах дьиэ кэргэттэр оруолларын үрдэтэр соруктаах.
Бэстибээл-куонкурус усулуобуйатын быһыытынан, дьиэ кэргэнинэн ансаамбыллар кыттыахтара (саастара уонна ахсааннара хааччахтаммат). Кыттааччылар иккилии ырыаны толоруохтара. Онуоха “Ааптар ырыата”, “Биллэр киинэлэртэн ырыалар”, “Оҕо сааһым ырыата”, “Норуот ырыалара” номинациялар баар буолуохтара.
Дьүүллүүр сүбэ түмүгүнэн бэстибээл кыайыылааҕар Гран-при уонна номинацияларынан көрөн, I, II, III истиэпэннээх лауреаттар ааттара быһаарыллыахтара. Дьиэ кэргэттэргэ барыларыгар бэстибээлгэ кыттыбаттарын туоһулуур дипломнар туттарыллыахтара.
Аан бастаан ыытыллар сонун бэстибээл-куонкуруска кыттыан баҕалаахтар усулуобуйаны бу аадырыска:
Дьокуускай куорат, Поярков аатынан уулусса 4 дьиэтигэр Өксөкүлээх Өлөксөй аатынан Норуоттар доҕордоһууларын дьиэтигэр, бастакы этээскэ 133 нүөмэрдээх кабинекка кэлэн билсиэххитин сөп. Эбэтэр 8(4112) 32-80-77 (факс нүөмэригэр), 32-83-86 (тэрийэр кэмитиэт) нүөмэрдэригэр эрийиҥ. Электроннай почта: Alexandradk@mail.ru Тэрийээччилэр нүөмэрдэрэ:
8964-427-6774, 8914-268-4143.
Надежда ЕГОРОВА, “Саха сирэ” хаһыат, edersaas.ru