Бүгүн Елена Николаевна уонна Николай Егорович Сергеевтэр сүрэхтэрин холбоон ыал буолан олорбуттарын 60 сылын Туймаада хочотугар бэлиэтиир дьоро күннэрэ.
edersaas.ru
Сунтаар улууһун Күндэйэ нэһилиэгин бочуоттаах олохтооҕо, «Ытык кырдьаҕас» бэлиэ хаһаайына, үлэ тыыл бэтэрээннэрэ, олохторун тыа хаһаайыстыбатын сайдыытыгар анаабыт Елена уонна Николай Сергеевтэр олорон кэлбит олохторун, үлэлэрин туһунан кинигэ бу үтүө күнү көрсө күн сирин көрдө. «Олох устун бииргэ» кинигэҕэ оҕолоро, сиэннэрэ, бииргэ төрөөбүттэрэ, бииргэ үөрэммит, үлэлээбит үөлээннээхтэрэ, биир дойдулаахтара истиҥник ахтыбыттар.
Дьоһун кинигэттэн өр сылларга авиацияҕа үлэлээбит, РФ үлэ бэтэрээнэ, СӨ авиациятын бэтэрээнэ, СӨ салгын тырааныспарын бочуоттаах үлэһитэ Александр Егорович Сергеев ахтыытын билиһиннэрэбит.
Төрөппүттэрбин суохтаппатахтара
Дьыл-хонук ааһара түргэн да эбит. Биһиги дьиэ кэргэн саамай улахан убайбыт Николай Егорович бэлиэр 85 сааһын туола оҕуста. Кини Күндэйэҕэ убаастанар ыал саамай улахан уоллара. Онтон мин ыал кыра оҕото этим. Эдьиийдэрим, убайдарым улаатан бары кэриэтэ үлэһит буолан, атын сиргэ олорбуттара. Онон, Ньукулайдаах биһиэхэ олорбуттара. Мэлдьи үлэ дьоно буолан, дьиэҕэ көстүбэттэрэ. Саҥаһым Елена Николаевна кэлиэҕиттэн буолаҕа моркуоп, сүбүөкүлэ, хаппыыста уо.д.а. олордор буолбута.
Дьонум кыра эрдэхпинэ өлөннөр, убайбар Ньукулайга, эдьиийбэр Нинаҕа иитиллибитим. Саҥаспыт Елена Николаевна биһиэхэ барыбытыгар ийэбитин солбуйбута. Кини наһаа көнө-көрсүө, сэмэй, элбэх саҥата суох, үлэһит киһи. Биэс кыыһын төрөөбүт Аканатыгар баран оҕоломмута. Онтон икки уол аҕаларын дойдуларыгар күн сирин көрбүттэрэ. Ити айылҕа дьиктитэ буолуо дии саныыбын. Былыр ийэ иһигэр уол дуу, кыыс дуу сылдьарын хантан курдары көрөн билиэхтэрэй?
Бэһис кылааһы бүтэрэр сылбар аҕам өлбүтэ. Күһүн оскуолаҕа киирэрбэр эдьиийим Нина Тойбохойго илдьэ барбыта. Эһиилигэр Күндэйэҕэ төттөрү кэлбитим. Сэттис кылааска үөрэнэ сырыттахпына, саас Аканаҕа көспүттэригэр барсыбытым. Саҥаһым аймах уолаттарын кытары бэркэ билсэн үөрэммитим. Билигин да билсэбит. Тойбохойго оскуоланы бүтэрэн кэлбитим. Ньукулайдаах төттөрү Күндэйэҕэ көһөн кэлбиттэрэ. Гошалаах Вася миигин көһөрөн, убайым аахха төттөрү көспүтүм.
Ньукулай улахан өйдөөх киһи буолан, итиччэ элбэх оҕолоох эрээри, бэйэлэрэ кыра хамнаска сылдьан, улахан саҥа дьиэ туттубуттара. Аармыйа кэнниттэн кэлбитим лесхозка леснигинэн үлэлии сылдьар этэ. Онно кэлэн сөхпүтүм, убайым барыны бары оҥорор буолбут этэ. Ынах муоһуттан ытык, кыраабыл оҥортуур этэ. Дьиэтин миэбэлин Москуба куораттан баран аҕалбыта. Ол саҕана наһаа да кыраһыабай миэбэл этэ.
Нэһилиэгин туһугар эмиэ сүүрбүт-көппүт киһи. Мунньах аайы оскуоланы туруорсан, ыра санаата олоххо киирбитэ. Билигин оҕолор барахсаттар икки этээстээх таас оскуолаҕа үөрэнэллэр. Күндэйэ туспа сопхуос буоларыгар улахан кыттыыны кини ылбыта. Сопхуос материальнай-техническэй базата кэҥииригэр өҥөтө эмиэ улахан. Ол саҕана уокка холбонор хобордоохтору аҕалан тарҕаппыта. «Сергеев хобордооҕо» диэн нэһилиэккэ билигин да саныыллар.
Мин ыал буоларар убайым, саҥаһым сыбаайбабын тэрийбиттэрэ. Инньэ гынан, дьоммун суохтаппатахтара. Бастакы дьиэбин туттарбар биир сүөһүнү биэрбитэ. Онон, убайбар Ньукулайга, саҥаспар Еляҕа махталым муҥура суох, саныы-саныы ис сүрэхпиттэн үөрэбин. Оҕолорун, сиэннэрин барыларын үөрэттэрэн, ыал оҥортоон биһиги дьоммут бэйэлэрин ытык иэстэрин таһынан толорбут дьон. Өрүү өрэ-көтө өссө да дьоллоохтук, уһуннук олоруҥ, дьонум барахсаттар.
Надежда ЕГОРОВА, «Саха сирэ» хаһыат, edersaas.ru