Оҕо сүрэҕэр кыымы уматан күөдьүтэр, сайыннарар, талба талаанын арыйар, олох сатабылларыгар үөрэтэр ураты дьоҕур эбии үөрэхтээһин педагогар баар.
Н.М.Родионова аатынан Сунтаардааҕы оҕо дьоҕурун сайыннарар киин улууска эбии үөрэхтээһин эйгэтигэр уһуннук, бэриниилээхтик үлэлээбит, үлэлии сылдьар педагогтарынан киэн туттар. Онтон бу күннэргэ үлэ үөһүгэр сылдьар, эдэр, инникилээх биир идэлээхпит, үрдүк категориялаах эбии үөрэхтээһин педагога, «Инженеры будущего» куруһуок салайааччыта Андриан Егорович Максимов айар үлэтин 15 сылын бэлиэтиир.
Андриан Егорович эбии үөрэхтээһин эйгэтигэр тута кэлбэтэҕэ, ол эрэн учуутал Максимовтар дьиэ кэргэннэригэр аҕата Егор Егорович — педагог, сатабыллаах “көмүс илиилээх” маастар этэ. Ийэтэ Зинаида Георгиевна – муусука, ИЗО учуутала, саахымат тириэньэрэ Кириэстээххэ үгүс оҕоҕо кэрэ, искусство өйдөбүлүн иҥэрбит, интеллектуальнай өйү-санааны уһугуннарбыт убаастанар киһи инники идэтин таларыгар олук буолбуттара. Аан бастаан Намнааҕы педагогическай колледжка технология учуутала уонна урбаанньыт идэтин бүтэрбитэ. Сунтаардааҕы уолаттар гимназияларыгар учууталлаабыта, онтон салгыы ХИФУ үөрэнэн архитектор идэтин ылбыта. Устудьуоннуур сылларыгар Дьокуускайга Саха сирин архитектордарын Союһун иһинэн «Оҕо оскуолата-архитектура уонна дизайн студията” (сал. Исматова Нь.С.) педагогунан үлэлээн архитектурнай үөрэхтээһиҥҥэ студия үөрэнээччилэрэ Бүтүн Арассыыйатааҕы быыстапкаларга, бэстибээллэргэ уонна олимпиадаларга кыттан ситиһиигэ бастакы хардыылары оҥорбуттара.
Билигин Сунтаардааҕы оҕо дьоҕурун сайыннарар киин педагога Максимов А.Е. үөрэтэр бырагыраамалара: “Инженеры будущего”, “3D моделирование төрүттэрэ» инклюзивнай эбии үөрэхтээһин, сыллата ыытыллар “Ай-тут, уол оҕо”, “Инникигэ хардыы”, “Дойдум-Отечество”, “Руками” фестиваль, 3D моделирование чемпионаттара о. д. а. анал бырагыраамаларын сэргэ Сунтаардааҕы гимназияҕа технологияны үөрэтэр. Үс кэнники сылга улууска “WorldSkills» («Молодые профессионалы») чөмпүйэнээт «Инженерный дизайн CAD» и «Промышленный дизайн» компетенциялары сүрүннүүр. «Наследие архитектуры родного края», «Я-зодчий» ааптарскай бырайыак уонна «Workshop» архитектурный клаузур бырайыактары олоххо киллэрэри таһынан араас таһымнаах куонкурустарга, чөмпүйэнээттэргэ үөрэнээччилэрэ ситиһиилээхтик кытталлар. Андриан Егорович үөрэтэр оҕолоругар олус харыстабыллаахтык, аҕа табаарыстыы доҕордуу сыһыаннаах. Үөрэнээччитэ Николай Степанов билигин улуус кылаабынай архитектора, оҕолор Контогоров Вася, Антонов Тимур, Николаев Тимофей, Решетников Артем о.д.а. умсугуйан туран дьарыктаналлар. Тимофей Николаев билигин тиэхиньиическэй хайысхалаах «Океанские принты» симиэнэҕэ “Океан” Бүтүн Арассыыйатааҕы оҕо киинигэр Владивостокка сынньана, үөрэнэ сылдьар.
Муус устар 15-16 күннэригэр “Архитектурнай хакатон: Г.Н.Саввинов-Уус Киргиэлэй аатынан култуура уонна сынньалаҥ пааркатыгар “Күнчээн”оҕо былаһааккатын бырайыактааһын“ улуустааҕы куонкурус ыытыллыаҕа. Хакатон кэмигэр педагогтар сэминээргэ кыттан, оҕолор бырайыактыыр үлэлэри оҥорон саҥаны билиэхтэрэ, элбэххэ үөрэниэхтэрэ. Бастыҥ бырайыак олоххо киирэн үйэлээх тутуу буолуоҕа, оҕо-аймах дьиэ кэргэнинээн тоҕуоруһа мустар, сынньанар сирэ буолуоҕар эрэнэбит.
Андриан Егоровичтан талан ылбыт идэҕин биир этиинэн ойуулаа диэбиппэр: “Мин идэм – идэтийбит дьонтон талааны, дьүккүөрү, дириҥ билиини таһынан оҕоҕо тапталы, дьону ытыктааһыны уонна ыарахаттартан чаҕыйбат буолууну ирдиир”, — диэн этэр. Онтон саҥа саҕалыыр педагогтарга кэлэр кэм хаһан баҕар сырдык, онон кэрэни таптааҥ, онно дьулуһуҥ, айыҥ-тутуҥ диэн баҕа санаатын тиэрдэр.
Мэлдьитин инникигэ дьулуһар, саҥа саҕахтары арыйар талааннаах биир идэлээхпитигэр Андриан Максимовка айар үлэҥ аартыга аһаҕас буоллун, инникилээх буоллун диэн бу үөрүүлээх күҥҥүнэн үөрэн туран итиитик-истиҥник эҕэрдэлиибит.
edersaas.ru саайтка анаан Айна ЯКОВЛЕВА.