Маны аах Уопсастыба

Олох очурдарыгар оҕустарбыт дьоҥҥо аһымал аахсыйа тэрилиннэ

Бэҕэһээ, от ыйын 30 күнүгэр, Дьокуускайга «Дьиэбэр айан» диэн социальнай аһымал аахсыйа буолан ааста.

Аахсыйа кэмигэр ускул-тэскил дьон ортотугар оҥоһуллубут анаалыс түмүгүнэн түбүркүлүөстээх, ВИЧ-инфицированнай, сифилис ыарыылаах дьон бааллара билиннэ. Өйөбүлгэ наадыйан кэлбит 69 киһини эмчиттэр көрдүлэр-иһиттилэр, уйулҕа үөрэхтээхтэрэ оллоонноон олорон кэпсэттилэр. Маны таһынан, докумуоннара сүппүт дьоҥҥо сүбэ-ама биэрдилэр, аччык дьону итии аһынан аһаттылар.

СӨ Киһи быраабын көмүскүүр боломуочунай Сардана Гурьева тэрээһин туһунан бу курдук санаатын үллэһиннэ:

— Бу аһымал аахсыйаны биһиги ахсыс төгүлүн ыытабыт. Быйылгы тэрээһин доруобуйа харыстабылыгар туһаайылынна. Онон, түгэнинэн туһанан, аахсыйаҕа кыттыбыт эмчиттэргэ тэрээһини өйөөн кыттыбыттарыгар истиҥ махталбын тиэрдэбин.

Урбаанньыт Хуршид Рахматов итии аһынан хааччыйан, кыһалҕалаах дьон босхо аһыыр кыахтаннылар. Өскө бу маннык тэрээһинтэн саатар биир киһи таба суолга үктэннэҕинэ, ол аата сырабыт таах хаалбатах эбит диэхпит этэ. Дьон араас төрүөтүнэн уулусса киһитэ буолан хаалар түбэлтэлэрэ үгүс.  Биһиги хайдах эрэ хаайыыттан босхоломмут дьон, кыайан бэйэлэрин булбакка, ускул-тэскил баралларын курдук саныыбыт. Кэлиҥҥи кэмҥэ киһи үөйбэтэх араас түбэлтэтэ үгүс. Маннык дьону кэмигэр бэлиэтии көрөн, көнө суолга үктэннэрии — кэм ирдэбилэ. Онон ускул-тэскил  сылдьыыны бохсор олус туһаллаах  өрөспүүбүлүкэтээҕи сокуону оҥоруу түргэтиэн наада.

Аахсыйаҕа кыттыыны ылбыт дьонтон фтизиатрга 52 киһи көрдөрбүтүттэн, 3 киһи түбүркүлүөстээҕэ билиннэ, 11 киһи тустаах исписэлиис көрүүтүгэр туһаайылнна, 3 киһини балыыһаҕа киллэрдилэр.

СПИД киинин эмчиттэрэ 74 киһини көрдүлэр. Онно гепатит б ыарыыга — 3; гепатит с — 4; сифилис -12 киһи бэлиэтэннэ. Наркологическай диспансерга 4 киһини киллэрдилэр (онтон 1 киһи — суһал көмөнөн), 10 киһи арыгыттан эмтэниэҕэ.  Уйулҕа үөрэхтээхтэрэ 69 киһини көрдүлэр.

Докумуоннарын сүтэрбит дьон үгүс: пааспар остуолугар 34 киһи сырытта.  31 киһи докумуонун сүтэриитигэр көмө ылла. 5 саҥа пааспар, 13 кылгас кэмнээх  дастабырыанньа бэрилиннэ. Докумуону саҥаттан оҥотторууга 9 сайабылыанньа киирдэ.  Социальнай хайысхалаах дьиэлэргэ киириэн баҕалаах дьон эмиэ көһүннүлэр: «Линия жизни» — 4 киһи , «Алмаз» — 2 киһи, «Тирэх» — 10 киһи.  2 киһи дойдуларыгар төннөр баҕалаахтарын биллэрдилэр. Нам улууһун баһылыга Юрий Слепцов  ол дьону дьиэлэригэр диэри тиэрдэр көлөнөн хааччыйыаҕа. Баҕа өттүнэн 2 киһи сыстыганнаах дьаҥтан харыстанар быһыыны ылла.

Ити курдук, СӨ Киһи быраабын көмүскүүр боломуочунай Сардана Гурьева салайар тэрилтэтэ пандемия бүрүүкээн турар тыҥааһыннаах кэмигэр олох очурдарыгар оҕустарбыт дьон бырааптарын көмүскүүр олус наадалаах социальнай хайысхалаах аахсыйалары тэрийэн, үгүс дьону көнө суолга үктэннэрэр соруктаах.

Елена ПОТОЦКАЯ, “Саха сирэ” хаһыат, edersaas.ru

Хаартыска — СӨ Киһи быраабын көмүскүүр боломуочунай пресс-сулууспата тиксэриитэ.

1
0