Бастакы сонун. Саха Өрөспүүбүлүкэтин тутууга министиэристибэтэ “СӨ куортамҥа бэриллэр уонна наймыланар дьиэлэри тутуу” тэрээһиҥҥэ докумуоннары тутуу саҕаламмытын туһунан иһитиннэрбитэ.
Онон бу тэрээһиҥҥэ олоҕуран, Дьокуускай куорат Б.Чижик уулусса 31 дьиэтигэр олорор дьиэлэргэ куортамнааһын дуогабарын түһэрсии буолар. Куортамҥа 14000 сыаналаах биир хостоох 2 кыбартыыраны биэрэргэ былааннаабыттара, диэн СИА иһитиннэрэр.
Бу хос бырагыраамаҕа 1 группалаах инбэлииттэр, инбэлиит оҕолоох ыаллар, Дьокуускай куоракка уһуннук эмтэнэллэрэ ирдэнэр ыараханнык ыалдьар оҕолоох ыаллар кытталлар.
Ол эрээри, манна кыттыы ирдэбиллэрэ кытаанахтар. Ол курдук, Дьокуускай куоракка социальнай наймылаһыы дуогабарын түһэрсибэтэх эбэтэр үс сыл устата дьиэни бас билээччинэн буолбатах буолуохтаахтар. СӨ бырабыыталыстыбатын уурааҕынан олохтоммут нэһилиэнньэ биир дууһатыгар тиксэринэн тиийиинэн олоруу алын кээмэйиттэн 0,8 быр. кырата суох дохуоттаах буолуохтаахтар. Докумуоннары www.e-yakutia.ru судаарыстыбаннай уонна муниципальнай өҥөлөр порталларыгар туттулар.
Иккис сонун. Дьокуускайга “Трансстрой” салайар хампаанньа бэйэтэ көрөр-истэр дьиэлэригэр хомунаалынай өҥөнү төлөөһүҥҥэ эмиэ биир бэртээхэй хардыыны оҥордо. Бу хампаанньа ититии иһин (отопление) хаттаан ааҕыыны оҥорон, өҥөнү туһанааччыларга үбү төнүннэрэ турар, ол суотугар олохтоохторго хомунаалынай өҥөлөрө аччыыр. Хампаанньа хайа тэриллиэҕиттэн сыл аайы маннык дьаһанар. Онон быйыл да итинник тэринэн, коронавирус кэмигэр төлүүллэригэр уустуктары көрсөр дьону абыраатылар.
Женни СТРЮКОВА, “Саха сирэ” хаһыат
Хаартыска: интэриниэттэн